ཛམྦྷུའི་ཡུལ།སྔ་མའི་པར་གཞི་དེ སེང་ལྡེང་མཚོ། ནས 2018-12-13 15:17ལ་འགྲུབ།
ཨི་ར་ན་བྷ་ཏའི་ཡུལ་དེ་ནས་གངྒཱའི་ཀླུང་གི་འབབས་ཕྱོགས་སུ་བརྒྱུད་དེ་ཤར་དུ་རྒྱང་གྲགས་སུམ་བརྒྱ་ལྷག་ཕྱིན་པ་ན་ཛམྦྷུའི་ཞེས་བྱ་བའི་ཡུལ་ཐ་གྲུར་རྒྱང་གྲགས་བཞི་སྟོང་ཙམ་དང་དབུས་ཀྱི་མཁར་ཆེན་གྱི་ཁོར་ཡུག་ཏུ་རྒྱང་གྲགས་བཞི་བཅུ་ཙམ་ཡོད་པ་དང་། གནམ་གཤིས་དྲོ་ཞིང་བརླན་གཤེར་ཆེ་བས་འབྲུ་སྣ་ཚོགས་འདེབས་པ། མིའི་རང་བཞིན་གཡུང་ཞིང་བརྟན་པ། གཙུག་ལག་ཁང་བཅུ་ཕྲག་དུ་མ་ཡོད་ཀྱང་ཕལ་ཆེར་གོག་པོར་གྱུར་པ་མང་ངོ་།། དགེ་འདུན་ཉིས་བརྒྱ་ལྷག་ཡོད་པ་ཀུན་ཐེག་དམན་པའོ།། མུ་སྟེགས་པའི་ལྷ་ཁང་བཅུ་ཕྲག་གཉིས་ལྷག་པར་ཕྱི་རོལ་པའི་རིགས་སྣ་ཚོགས་འདྲེས་མར་གནས་སོ།། མཁར་གྱི་རྒྱུ་ནི་སོ་ཕག་དང་གྱོ་མོས་བརྩིགས་པ་དཔངས་སུ་འདོམ་དོ་མི་ལོངས་པ། གནའ་དུས་སྐྱེ་བོ་རྣམས་ཁང་ཁྱིམ་མེད་ཅིང་སྤྱིལ་བུ་དང་ཁུང་བུར་གནས་ཏེ་སོ་ཚིས་བསྒྲུབ།
གྲོང་ཁྱེར་གྱི་ཤར་དུ་རྒྱང་གྲགས་བརྒྱ་དང་བཞི་བཅུ་ལྔ་བཅུ་ཙམ་ཕྱིན་པ་ན། གངྒཱའི་ལྷོ་འགྲམ་གྱི་རི་བོ་མཐོ་བ་ཞིག་ལ་ལྷ་ཁང་ངོ་མཚར་ཆེ་བ་ཞིག་སྣང་ངོ་།། ཆུ་མིག་ཆུ་ཡུར་བ་ལ་དྲངས་ཏེ་རྫིང་བུར་བསྐྱིལ་བ་མེ་ཏོག་དང་ཤིང་ཏོག་མཚར་པའི་ཚལ་གྱིས་བརྒྱན་པ། དྲང་སྲོང་གྲུབ་པའི་རིགས་གསང་བའི་རྣལ་འབྱོར་པ་མང་པོ་གནས་ཤིང་། གླང་རྒོད་དང་གཅན་གཟན་ཁྱུར་ལོངས་པ་རྒྱུའོ།།