བེ་ན་བྷ་ཐནཱའི་ཡུལ་དེ་ནས་ཤར་ཕྱོགས་སུ་རྒྱང་གྲགས་དགུ་བརྒྱ་བགྲོད་ནས་ཆུ་ཀླུང་ཆེན་པོ་ཞིག་བརྒལ་བ་ན། ཀ་མ་རུ་པའི་ཡུལ་དེའི་ཐ་གྲུ་རྒྱང་གྲགས་ཁྲི་ཚོ་གཅིག་ཡོད་དོ།། གཞུང་མཁར་ཁོར་ཡུག་ཏུ་རྒྱང་གྲགས་སུམ་ཅུ་ལྷག་ཡོད་པ། ས་གཞི་དྲོ་ལ་གཤེར་བའི་འབྲུ་གང་ཡང་འདེབས་ཤིང་། ལྷག་པར་ཤིང་ཏོག་སྲ་ན་ས་དང་ན་ར་ཀི་ར་མོད་པ་དང་ཤིང་ཏོག་དེ་དག་གི་རིན་ཆེའོ།། མིའི་རང་བཞིན་སྡུར་མ་ལུས་བོངས་ཆུང་བ་གདོང་ནག་པ། ཆུ་ཀླུང་རིགས་དང་མཚོ་རྫིང་འདྲེས་མར་གནས་པ། གྲོང་དང་ལྗོངས་ཀྱང་ཆལ་མར་གདལ་བ། སྐད་རིགས་མ་གྷ་ཏ་པ་ལས་ཅུང་མི་མཐུན།
རྒྱལ་པོ་ནི་ལྷ་སེད་མེད་ཀྱི་བུ་ལས་མཆེད་པའི་བྲམ་ཟེའི་རིགས་པ་པ་པྲ་ཀ་ན་ཟེར་རོ་ཡུལ་མི་དམངས་ཀུན་མཆོག་ལ་དད་པ་མེད་ཅིང་གཙོ་བོ་གསུམ་གྱིས་གཙོས་འཇིག་རྟེན་པའི་ལྷ་ཁོ་ན་ལ་བརྟེན་ནོ།། དཀོན་མཆོག་ལ་མོས་པ་རེ་གཉིས་ཙམ་ཡོད་པ་ནི། གཟུངས་སྔགས་དང་ཡིད་ཀྱིས་གསོལ་བ་བཏབ་པ་ཙམ་ཡིན། མུ་སྟེགས་པའི་ལྷ་ཁང་བརྒྱ་ཕྲག་དུ་མ་ཡོད་པར་ཕྱི་རོལ་པ་ཁྲི་ཕྲག་དུ་མ་གནས་སོ།། རྒྱལ་པོ་ཡང་མི་རབས་སྟོང་དུ་དབུ་རྨོག་བཙན་པར་གནས་སོ།། སློབ་གཉེར་ལ་འགྲུས་པ་ཡོན་ཏན་ལ་དགའ་བ་ཕྱི་ནང་གི་ཕྱོགས་སུ་མ་གཏོགས་ཀྱང་། རིས་མེད་ཀྱི་མཁས་པ་ལ་བཀུར་སྟི་ཆེ་བ་ཞིག་ཡིན།