འབོ་ར་ཚོ་བཞི་ནི་གཙོས་གྲོང་ཁྱེར་གྱི་ལྷོ་མཚམས་སུ་གནས་ཤིང་། ཤར་དུ་ཀླུ་ཤོད་དང་། ལྷོར་རྨེད་ཤིས་དང་སྒྱིས་ཚང་། ནུབ་ཏུ་ཨ་མཆོག བྱང་དུ་གཙོས་དང་། རྡོ་དཀར། ཙ་ཡུས་བཅས་དང་ས་མཚམས་འདྲེས། དེང་སང་འབོ་ར་ཞང་ཁག་གི་ཁོངས་སུ་གཏོགས། འབོ་ར་ཞེས་པ་འབོ་དགེའི་ར་གུར་ཞེས་པའི་བསྡུས་མིང་ཡིན་པར་གྲགས། སྐྱོག་སྟོན་ལོ་ཆེན་གྱིས་མཛད་པའི་ལི་ཤིའི་གུར་ཁང་དུ། མངའ་བདག་ཁྲི་རལ་བ་ཅན་གྱི་སྐབས་སུ། དབུས་གཙང་གི་རུ་སོ་སོ་ནས་དམག་བསྡུས་ཏེ་རྒྱ་བོད་གཉིས་ཀྱིས་མཚམས་སུ་དྲངས། དམག་དེ་དག་ལས་གཙང་གི་གཉའ་འབུར་པོ་ནས་ཡིན་པའི་དམག་དཔོན་སྔ་འགྱུར་གསང་སྔགས་རྙིང་མར་ཤིན་ཏུ་དད་པ་ཞིག་གིས་དམག་མི་འཁོར་དང་བཅས་པའི་རུ་སྣ་ཡུལ་འདིར་དྲངས་ཏེ་བསྡད། རིམ་བཞིན་དེའི་གདུང་རྒྱུད་འཕེལ་ཏེ་ཚོ་ཆེན་ཞིག་ཏུ་གྱུར། ཀུན་གྱིས་སྔགས་རྙིང་མའི་དམག་དཔོན་དེར་འབོར་ནས་འོང་བའི་དགེ་རྒན་ནམ་འབོར་དགེ་ཞེས་གསོལ། འབོར་དགེའི་སྦྲ་གུར་གནས་འདིར་ཕུབས་པས་འབོ་ར་ཞེས་པའི་མིང་ཆགས་ཟེར་རོ། །དམག་དཔོན་འབོར་དགེའི་གདུང་རྒྱུད་ཀྱིས་ཡུལ་འདི་བཟུང་ཞིང་རིགས་རྒྱུད་འཕེལ་ཏེ་སྒོག་ནང་ཁག་དང་། ནོར་ལུང་ཁག གཡག་པ་ཁག སྐྱ་ཐེ་ཁག སྦོག་ཚ་ཁག་བཅས་ཡུལ་སྡེ་བཞི་ཆགས། རབ་བྱུང་བཅུ་གསུམ་པའི་ས་སྟག་སྟེ་སྤྱི་ལོ1758ལོར་འབོ་ར་དགོན་དགའ་ལྡན་བཤད་སྒྲུབ་གླིང་བཏབ། ས་ཕག་ལོར་སྐྱབས་རྗེ་ཀུན་མཁྱེན་གཉིས་པ་རྗེ་བཙུན་འཇིགས་མེད་དབང་པོ་མཆོག་ཉིད་འབོ་ར་དགོན་དུ་ཕེབས་དུས་དགོན་པ་དང་ལྷ་སྡེ་ཚོ་བ་བཅས་པ་ཀུན་མཁྱེན་ལ་ཕུལ། མཆོག་ཉིད་ནས་ཀྱང་འབོ་ར་དགོན་པར་དངུལ་སྲང་བརྒྱ་དང་མཛོ་རྟ་ལྔ་བཅུ་རེ། ལུག་བརྒྱ་བཅས་པའི་འགྱེད་བཏང་། དུས་དེ་ནས་བཟུང་འབོ་ར་ཚོ་བ་བཞི་ནི་བླ་བྲང་དགོན་པའི་ལྷ་སྡེའི་ནང་ཚན་དུ་གྱུར་ཞིང་བླ་བྲང་དགོན་པས་འགོ་པ་དང་ཁྲི་པ་མངགས་ཏེ་དགོན་སྡེ་དང་ཚོ་བ་བདག་སྐྱོང་བྱེད་དོ། །
དེར་ཁྱོམ་དགེ་དང་། སྔོན་པོ་ཐང་། རོང་བོ་ཁོག་ཚ་ངུ་ཐང་། ཀ་སྐྱའི་རྩ་གསུམ། ལྷ་འབུམ་ཐང་རུ་འགབ་མ། རི་བར་མའི་འབྲོག་སྡེ། རི་གོང་མའི་ལྷ་སྡེ། གྲུ་གུ་ནང་། ཡག་པའི་སྟེང་དཀར་ལུང་། ལུག་ཀྱག ལེགས་པོ་ཉིན་ཡར་ག ཡར་སྣེ། སྒྲོག་གོང་མ། སྒྲོག་ཞོལ་མ། ཨ་ལ་བཅས་ཡུལ་སྡེ་བཅོ་བརྒྱད་མངའ།
དེར་སྦོག་ཙ་མདོ་དང་། རྒྱ་ར། འདའ་འདུ། སྡེ་བ་ཆེ་བོ། ཇག་ལམ། ཐེ་བོ་བཅས་ཡུལ་སྡེ་དྲུག་མངའ།
ཚོ་བ་འདིའི་མིང་གཞན་ལ་འབོ་ར་ཚོ་བའང་ཟེར། དེར་འབོ་ར་མདོ། གོའུ་ནང་། སྦོས་ལུང་། ཕྲེད་ལུང་། ལུང་ཀྱོག་གོང་འགབ། རྡར་བ། རྩ་ས། དར་མདོ། ནོར་ལུང་གོང་འགབ། སྐྱེད་སུམ། ལོ་ཡག་ཐང་། མཁར་ནག་བཅས་ཡུལ་སྡེ་བཅུ་བཞི་མཆིས་སོ། །