འདོད་ཅེས་པ་ནི་ཐལ་བ་འཕངས་པ་དེ་ཉིད་དམ་བཅའ་བའི་འདོད་པ་ཡིན་ཞེས་པའི་དོན་ཡིན།
དེས་ན་རྟགས་གསལ་རྩོད་གཞི་གསུམ་ག་དང་ལྡན་པའི་ཐལ་འགྱུར་གང་དང་གང་ལ་འདོད་ལན་བཏབ་ན་ཐལ་འགྱུར་དེའི་རྩོད་གཞི་གང་ཡིན་པ་དེའི་སྟེང་དུ་གསལ་བ་དེ་སྦྱར་ནས་འདོད་ལན་འདེབས་དགོས། ཡང་ན། ཐལ་འགྱུར་གང་དང་གང་ཡིན་ནའང་ཆོས་ཅན་ནུས་ཡོད་ཅན་གྱི་ཐལ་འགྱུར་ལ་འདོད་ལན་འདེབས་ཚེ་ཆོས་ཅན་དང་གསལ་བ་གཉིས་བསྡོམས་ནས་ལན་འདེབས་དགོས་ཤིང་། གསལ་རྐྱང་ལ་ཆོས་ཅན་དང་བསྡོམས་རྒྱུ་མེད་པས་གསལ་རྐྱང་ལ་འདོད་ལན་འདེབས་དགོས། ཤེས་བྱ་ཆོས་ཅན། སྒྲ་མི་རྟག་མི་ཡིན་པར་ཐལ། ཞེས་པའི་ཐལ་འགྱུར་ལྟ་བུའི་ཆོས་ཅན་ལ་ནུས་པ་མེད་པས་སྒྲ་མི་རྟག་པ་ཡིན་པར་འདོད་ཅེས་ལན་གདབ་པར་བྱའོ། །
དཔེར་ན། ཆོས་དུང་དཀར་བོའི་ཁ་དོག་ཆོས་ཅན། དཀར་བོ་ཡིན་པར་ཐལ། ཆོས་དུང་དཀར་བོའི་ཁ་དོག་ཡིན་པའི་ཕྱིར། ཞེས་པའི་ཐལ་འགྱུར་ལ་འདོད་ལན་བཏབ་ན་ཆོས་དུང་དཀར་བོའི་ཁ་དོག་དཀར་བོ་ཡིན་པར་འདོད་ཅེས་ཟེར་དགོས་ལ་འདོད་ལན་ཐེབས་པ་ཡང་ཡིན་ཏེ། ཆོས་དུང་དཀར་བོའི་ཁ་དོག་དཀར་བོ་ཡིན་པའི་ཕྱིར། དེས་གཞན་ཐམས་ཅད་ལ་མཚོན་ནུས་སོ། །
འདོད་ལན་ནི་ཆོས་ཅན་ཡོད་པའམ་ཆོས་ཅན་ལ་ནུས་པ་ཡོད་པ་ཡིན་ན། ཆོས་ཅན་ནས་རིམ་པར་བསྡོམས་ནས་བརྩི་དགོས་ཏེ། བུམ་པ་ཆོས་ཅན། དངོས་པོ་ཡིན་པར་ཐལ། འདུས་བྱས་ཡིན་པའི་ཕྱིར། ལྟ་བུ་ལ། ཆོས་ཅན་ལ་ནུས་པ་ཡོད་པས་བུམ་པ་དངོས་པོ་ཡིན་པར་འདོད་ཅེས་ལན་འདེབས་རྒྱུའོ། །