གདོང་སྣ་ཞེས་པའི་མིང་ཐོགས་དོན་ནི་བྲག་གདོང་ཞིག་གི་སྣ་ཁ་ན་གཞིས་ཆགས་པས་དེ་ལྟར་དུ་མིང་ཐོགས་ལ། རྒྱ་སྐད་དུ་ཁཱང་གཡང་ཞེས་འབོད་ལ། ཁཱང་གཡང་ཞེས་ཐོགས་དོན་ནི། ཡོན་རྒྱལ་རབས་ཀྱི་དུས་མཇུག་དང་མིན་རྒྱལ་རབས་ཀྱི་དུས་འགོར།རུས་ཁཱང་ཅན་དང་། གཡང་ཅན་གྱི་ཁྱིམ་རྒྱུད་ཅིག་ཀན་སུའུ་ཧི་ཀྲིག(河州)སོགས་ཀྱི་ས་ཆ་ནས་གནས་སྤར་ཡོང་སྟེ་འདིར་གཞིས་ཆགས་པས་ན་ཁཱང་གཡང་ཞེས་མིང་ཐོགས་པར་གྲགས། ལོ་རྒྱུས་ཀྱི་དུས་སྐབས་ངེས་ཅན་ཞིག་ཏུ་ཁྲི་ཀས་བདག་དབང་བྱེད་པ་ཡིན། སྐད་རིགས་ཀྱི་ཆ་ནས་རྒྱ་བོད་སྐད་མཉམ་སྤྱོད་བྱེད་པ་ཤུགས་ཆེ་ཞིང་། རྒྱ་སྐད་སྤྱོད་པ་དང་། སོག་པོའི་སྐད་རིགས་ཀྱི་ཁཱང་ཀྱཱའི་སྐད(ཁཱང་ཀྱཱའི་སྐད་ལ་ཡི་གེ་མེད)སྤྱོད་མཁན་ཡང་མི་སྐོར་ཅིག་ཡོད། སྡེ་བ་ཕལ་མོ་ཆེ་ཞིག་གསར་དུ་གཞིས་ཆགས་ནས་མི་རབས་ཤིག་འགོར་ཙམ་རེད། དེ་ལས་མཁར་ཐོག་ནི་རྒྱ་བྱ་ཚང་ཁྲེ་ཙེ་གསུམ་གྱི་གྲས་ཡིན་ལ། མིན་རྒྱལ་རབས་སྐབས་ཏེ་སྤྱི་ལོ1370ལོ་ནས་སྤྱི་ལོ1380ལོའི་བར་ལ་བཞེངས་པའི་གདོང་སྣའི་མཁར་གྱི་སྟོད་ཕྱོགས་སུ་ཡོད་པས་ན་མཁར་ཐོག་ཏུ་མིང་ཐོགས།