དགོན་གོང་མ་གྲོང་རྡལ།སྔ་མའི་པར་གཞི་དེ བསོད་ནམས་ཚེ་རིང་། ནས 2016-07-21 16:23ལ་འགྲུབ།
དགོན་གོང་མ་གྲོང་རྡལ་ཞེས་པ་ནི་མཚོ་ལྷོ་ཁུལ་འབའ་རྫོང་གི་ནུབ་ཕྱོགས་སུ་གནས་ཤིང་། སའི་གོ་ལའི་བྱང་གི་འཕྲེད་ཚད35。11′ནས35。12′ཀྱི་མཚམས་དང༌། ཤར་གྱི་གཞུང་ཚད100。29′ནས100。31′གི་མཚམས་ན་ཆགས་ཡོད། གྲོང་རྡལ་འདིའི་ཤར་ཕྱོགས་ནི་རྐ་འབའ་སུམ་མདོ་གྲོང་རྡལ་དང་རྩེ་ཁོག་རྫོང་གི་ཧོར་ཡུལ་ཚོ་དང༌། ལྷོ་ཕྱོགས་ནི་རྨ་བྱང་ཡུལ་ཚོ་དང་ཞོལ་མ་ཡུལ་ཚོ། ནུབ་ཕྱོགས་ནི་རྨ་ཆུ། བྱང་ཕྱོགས་ནི་འབའ་ལུང་ཡུལ་ཚོ་བཅས་ལ་འབྲེལ་ཡོད། འདི་ནི་སྤྱི་ལོ2006གི་ལོར་སྔོན་གྱི་ཐང་རྒན་ཡུལ་ཚོ་དང་མགོ་མང་ཡུལ་ཚོ་གཉིས་ཀ་བསྲེས་ནས་གྲོང་རྡལ་དུ་བསྒྱུར་བ་ཞིག་ཡིན། སྐབས་དེར་ཐང་རྒན་ཞེས་པའི་ཐང་དང༌། མགོ་མང་ཞེས་པའི་མགོ་གཅིག་ཏུ་བསྡོམས་ནས་འདིའི་མིང་ལ་ཐང་མགོ་གྲོང་རྡལ་དུ་བཏགས། སྔོན་གྱི་ཐང་རྒན་ཡུལ་ཚོའི་སྲིད་འཛིན་མངའ་ཁོངས་ཀྱི་མིང་འདོགས་ལ་སྔ་ཕྱིར་འཕོ་འགྱུར་བྱུང་བའི་རིམ་པ། ངག་རྒྱུན་ལྟར་ན། དུས་རབས་བཅུ་བདུན་པའི་སྐབས་སུ། ད་ལྟའི་དགོན་གོང་མ་ནི་རྩེ་ཁོག་རྫོང་གི་པན་ཁོག་ས་ཆ་ནས་ཐང་རྒན་དང༌།མགོ་མང༌། འཇང་ཆུང་བཅས་ཀྱི་ཕྱོགས་འདིར་སྤོས་ཏེ་གཏན་སྡོད་བྱས་པར་བཤད། སྤྱི་ལོ1952ལོར། འབྲོག་ཁུལ་ཡོངས་སུ་ཆུས་རིམ་པའི་སྲིད་དབང་འཛུགས་པའི་དུས་ན།ཐང་རྒན་ནི་སྲིད་འཛིན་ཆུས་དྲུག་པ་ཡིན（དགོན་གོང་མའི་ཁོངས་སུ་གཏོགས）། སྤྱི་ལོ1958ལོར་ཆུས་རིམ་པའི་སྒྲིག་གཞི་དོར་ནས་ཡུལ་ཚོ་འཛུགས་དུས་མགོ་མང་ཡུལ་ཚོའི་ཁོངས་སུ་སྦྱར། ལོ་དེའི་ཟླ་བཅུ་བར་ཀུང་ཧྲེ་རུ་བསྒྱུར། སྤྱི་ལོ1963ལོར་ཀུང་ཧྲེ་དག་ཡུལ་ཚོ་རུ་བསྒྱུར་དུས། གནས་འདིར་ཐང་རྒན་དང་ཆུ་དམར་ཡུལ་ཚོ་གཉིས་བཙུགས། སྤྱི་ལོ1965ལོར་ཐང་རྒན་དང་ཆུ་དམར་ཡུལ་ཚོ་གཉིས་བསྲེས་ཏེ་ཐང་རྒན་ཡུལ་ཚོ་བཙུགས། སྤྱི་ལོ1970ལོར་ཐང་རྒན་ཀུང་ཧྲེ་རུ་བསྒྱུར། སྤྱི་ལོ1984ལོར་ཕྱིར་ཐང་རྒན་ཡུལ་ཚོ་རུ་བསྒྱུར། སྔོན་གྱི་མགོ་མང་ཡུལ་ཚོའི་སྲིད་འཛིན་མངའ་ཁོངས་ཀྱི་མིང་འདོགས་ལ་སྔ་ཕྱིར་འཕོ་འགྱུར་བྱུང་བའི་རིམ་པ། སྔོན་གྱི་མགོ་མང་ཡུལ་ཚོའི་མངའ་འོག་གི་ཚོ་སྡེ་རྣམས་ནི་དགོན་གོང་མའི་ཁོངས་སུ་གཏོགས། དགོན་གོང་མ་ནི་འབའ་རྫོང་མངའ་འོག་གི་འབྲོག་པའི་ཚོ་ཤོག་ཆེན་པོ་བཞིའི（ཤ་སྦྲང་དང་། དགོན་གོང་མ། གཡུ་རྔོག མཐའ་འདུག་ཚོ་བཞི་བཅས）ནང་གི་གཅིག་ཡིན། སྤྱི་ལོ1950ལོའི་ཟླ་བདུན་པར་འབའ་རྫོང་མི་དམངས་སྲིད་གཞུང་བཙུགས་རྗེས། དགོན་གོང་མ་ཚོ་རྟིང་སོ་སོའི་སྤྱི་མགོ་ནས་ལག་བསྟར་ཨུ་ཡོན་ལྷན་ཁང་ཟེར་བ་ཞིག་བཙུགས། སྤྱི་ལོ1953ལོའི་ཟླ་དྲུག་པར་གོང་མ་ཕྱུགས་ལས་ཆུས་སྲིད་གཞུང་བཙུགས། སྤྱི་ལོ1956ལོའི་ཟླ་བཅུ་བ་ནས1957ལོའི་ལོ་མཇུག་བར་དུ། དགོན་གོང་མ་ནི་ཡང་བསྐྱར་སྲིད་འཛིན་ཆུས་གསུམ་པ་རུ་བསྒྱུར་ཅིང༌། དེའི་སྲིད་འཛིན་ལས་ཁུངས་ནི་མགོ་མང་གི་ཐོ་སི་སྡེ་བར་ཆགས། དེའི་མངའ་འོག་ན་དཔའ་མཆོག་དང༌། བོའུ་རྒྱ། ཉྭ་ནག གཡེར་སྐྱོང་བཅས་ཡུལ་ཚོ་བཞི་ཡོད། སྤྱི་ལོ1958ལོར་ཡུལ་ཚོའི་སྒྲིག་གཞི་དོར་ནས་ཆུས་ཀྱི་ཁོངས་སུ་སྲེ་བའི་སྐབས་སུ། བོའུ་རྒྱ་དང༌། དཔའ་མཆོག ཉྭ་ནག་གསུམ་བསྲེས་ནས་མགོ་མང་ཡུལ་ཚོ་བཙུགས། ལོ་དེའི་ཟླ་བཅུ་བར་དེའི་མིང་ནི་མགོ་མང་ཀུང་ཧྲེ་རུ་བསྒྱུར། སྤྱི་ལོ1963ལོར་ཀུང་ཧྲེ་རྣམས་ཡུལ་ཚོ་རུ་བསྒྱུར་སྐབས། དེ་ལས་ཁག་ཅིག་ཐང་རྒན་ཡུལ་ཚོའི་ཁོངས་སུ་སྦྱར། སྤྱི་ལོ1970ལོར་མགོ་མང་ཡུལ་ཚོའི་མིང་ནི་མགོ་མང་ཀུང་ཧྲེ་རུ་བསྒྱུར། 1984ལོར་མགོ་མང་ཡུལ་ཚོ་རུ་བསྒྱུར། གྲོང་རྡལ་འདིའི་སྲིད་གཞུང་ནི་ཐོ་སི་སྡེ་བར་ཆགས་ཡོད་ཅིང༌། དེ་ནས་རྫོང་ཐོག་ཏུ་སྤྱི་ལེ17ཡོད། སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ1019.2དང༌། མི་གྲངས12484ཡོད（སྤྱི་ལོ2009ལོའི་རྩིས་གྲངས་ཡིན）། འདིའི་མངའ་འོག་ན་ཝ་ཤུར་དང༌། མེ་རི་ཁུ། གཡུག་ལུང༌། ན་རིན། ཐོ་སི། དང་བོ། བྲ་ཤུར། ཡོ་འབྲིང༌། ཧ་ཞ། ཀླུ་ལུང༌། ཧོ་ཐོག སྐྱ་བོ། དུང་དཀར། གསེར་ཐང༌། ཆུ་དམར། ཅ་ལ་བཅས་སྡེ་བ16ཡོད།
དགོན་གོང་མའི་ལོ་རྒྱུས་ལྟར་ན། རབ་བྱུང་བཅུ་གཉིས་པའི（སྤྱི་ལོ1687ལོ་ནས1746ལོའི་བར）ཆུ་བྱ་སྟེ་སྤྱི་ལོ1732ཡས་མས་སུ། རེབ་གོང་ཕྱོགས་ཀྱི་ཚོ་སྡེ་མང་བོ་རྨ་ཆུའི་བྱང་ཕྱོགས་སུ་འབུད་པའི་དུས་སུ། དགོན་གོང་མ་ཡང་རྩྭ་ཆུ་བཟང་སའི་འབའ་ལུང་དུ་གཞི་སྤོར་མགོ་བརྩམས་པར་གྲགས། ཚོ་སྡེ་འདིའི་མཆེད་ཁུངས་ནི་རེབ་གོང་ཤོག་ཁ་བཅུ་གཉིས་ཀྱི་ནང་ཚན་བཙན་སྡེ་གསུམ་གྱི་ཡ་གྱལ་ཀོའུ་སྡེ་ཞེས་པ་དེ་ཡིན་པ་དང༌། འདིའི་མིང་གི་ཐོགས་ཚུལ་ལ་ངག་རྒྱུན་དུ་མ་ཡོད་དེ།
དང་པོ། དགོན་གོང་ཞོལ་བར་གསུམ་ལ་དང་ཐོག་སྒོ་གོང་ཞོལ་བར་གསུམ་ཚང་དུ་འབོད་པའི་ངག་རྒྱུན།
དེ་ཡང་ཚོ་སྡེ་འདིའི་མེས་པོ་གོང་མ་ཤེལ་མིག་ཀོའུ་མཐོང་གི་རྗེས་རབས་པ་བསྟན་འཛིན་ཆོས་སྤེལ་སྒྲོལ་མ་ཟེར་བར་བུ་གསུམ་སྐྱེས་པའི་རིགས་རྒྱུད་མང་དུ་འཕེལ་ནས་ཚོ་སྡེ་འདིའི་མིང་ལ་དང་ཐོག་སྒོ་གོང་མ་ཚང་དང༌། སྒོ་བར་མ་ཚང༌། སྒོ་ཞོལ་མ་ཚང་བཅས་སུ་འབོད་པ་དང༌། ཕྱིས་སུ་སྒོ་ཞེས་པའི་སྒྲ་འགྱུར་ནས་དགོན་གོང་འོག་བར་གསུམ་དུ་ཐོགས།
གཉིས་པ། དགོན་གོང་ཞོལ་བར་གསུམ་དུ་ཐོགས་པའི་ངག་རྒྱུན།
བཤད་ཚུལ་གཞན་ཞིག་ལ། སྔོན་དུས། ཚོ་སྡེ་འདི་ནི་རེབ་གོང་བདེ་རུང་གཞུང་གི་ཀླེ་ཁོག་ཏུ་སྤར་རྗེས། དགོན་གོང་མའི་ཚོ་རྟིང་བཞིའི་ཡ་གྱལ་དཔའ་མཆོག་ཚོ་བས།ཀླེ་ཁོག་ལུང་བའི་སྟོད་རྒྱུད་ཀྱི་ལྷས་གོང་མ་ཞེས་པའི་དགོན་ཤུལ་ཉེ་འདབས་ཀྱི་ས་བཟུང་བས་ཚོ་སྡེ་དེའི་མིང་ལ་དགོན་གོང་མ་རུ་ཐོགས་པ་དང༌།དགོན་གོང་མ་ཚོ་རྟིང་བཞིའི་ཡ་གྱལ་ཉྭ་ནག་ཚོ་བས། ཀླེ་ཁོག་ལུང་བའི་བར་རྒྱུད་ཀྱི་མཆོད་རྟེན་སྒར་ཁུག་ཅེས་པའི་དགོན་ཤུལ་གྱི་ཉེ་འདབས་བཟུང་བས་ཚོ་སྡེ་དེའི་མིང་ལ་དགོན་བར་མ་རུ་ཐོགས།དགོན་གོང་མ་ཚོ་རྟིང་བཞིའི་ཡ་གྱལ་ཨོའུ་རྒྱ་ཚོ་བས། ཀླེ་ཁོག་ལུང་མདོའི་ཁ་སོག་ཐང་དུ་གཞི་བཟུང་བས་ཚོ་སྡེ་དེའི་མིང་ལ་དགོན་ཞོལ་མ་རུ་ཐོགས།
གསུམ་པ། དགོན་གོང་མ་རུ་ཐོགས་ཚུལ་གྱི་ངག་རྒྱུན་གཞན་གཉིས།
ངག་རྒྱུན་དང་པོ། དགོན་གོང་འོག་བར་གསུམ་ནང་གི་ཆེ་བ་ནི་དཔའ་མཆོག་ཡིན་པས། ཚོ་སྡེ་འདིའི་སྤྱི་མིང་ལ་དགོན་གོང་མ་རུ་ཐོགས།
ངག་རྒྱུན་གཉིས་པ། རེབ་གོང་གི་རྫོང་དཀར་དགོན་ཐོག་མར་འདེབས་སྐབས། ཨོའུ་རྒྱ་དང༌། ཉྭ་ནག དཔའ་མཆོག གཡེར་སྐྱོང་བཅས་ཀྱིས་སྦྱིན་བདག་གཙོ་བོའི་འགན་ཁུར་བའི་སྟབས་ཀྱིས་དགོན་གོང་མ་རུ་ཐོགས་སོ་ཞེས་ཀྱང་གྲགས་སོ། །
དེ་ཡང་གོང་དུ་ཞུས་པའི་དཔའ་མཆོག་དང༌། ཨོའུ་རྒྱ། ཉྭ་ནག གཡེར་སྐྱོང་སྟེ། དཔའ་མཆོག་གོང་མའི་ཚོ་རྟིང་བཞི་བོ（འདིའི་ཁོངས་སུ་གསེར་ལག་མཐའ་བའང་འདུས）ནི། རེབ་གོང་ནས་འབའ་ཡུལ་དུ་སྤོས་པའི་ཚུན་ལ། དེ་དག་དུས་ད་ལྟའི་བར་དུ་ཡུལ་འབའ་རྫོང་གི་ཁོངས་རོལ་དུ་འཚོ་སྡོད་བྱེད་སའི་བྱེ་བྲག་གི་ས་ཁུལ་ནི། སྔོན་གྱི་ཐང་རྒན་ཡུལ་ཚོ་དང་མགོ་མང་ཡུལ་ཚོ་གཉིས་ཀྱི་མངའ་ཁོངས་ཧྲིལ་བོ་ཡིན་པས་ན། དགོན་གོང་མ་རུ་གྲགས་པའི་ཚོ་སྡེའི་མིང་འདི་ནི། གོང་གསལ་ཡུལ་ཚོ་དེ་གཉིས་ཀྱི་ཁོངས་སུ་གཏན་འཇགས་དང༌། རྒྱུན་འབྱམས། ཡོངས་གྲགས་བཅས་སུ་སོང་ཡོད་པའི་ཡུལ་ཕྱོགས་རང་བཞིན་གྱི་སྤྱི་མིང་དུ་གྱུར་ཡོད། དེའི་ཕྱིར། སྤྱི་ལོ2006གི་ལོར་སྔོན་གྱི་ཐང་རྒན་ཡུལ་ཚོ་དང་མགོ་མང་ཡུལ་ཚོ་གཉིས་བསྲེས་ནས་ས་ཁུལ་འདི་གྲོང་རྡལ་དུ་བསྒྱུར་སྐབས། སྔོན་གྱི་ཐང་རྒན་ཞེས་པའི་ཐང་དང་མགོ་མང་ཞེས་པའི་མགོ་གཉིས་གཅིག་ཏུ་བསྡོམས་ནས་འདི་ལ་ཐང་མགོ་གྲོང་རྡལ་དུ་བཏགས་ཀྱང༌། སྔ་གོམས་རྗེས་འཇུག་གི་དབང་གིས། ད་ལྟ་གྲོང་རྡལ་འདིའི་མངའ་འོག་གི་རྒྱ་ཁྱབ་ལས་བྱེད་དང་མང་ཚོགས་ཀྱིས་གྲོང་རྡལ་འདིའི་མིང་ལ་སྔར་བཞིན་དགོན་གོང་མ་ཟེར་བཞིན་ཡོད།