གསེར་ཐའི་ཡུལ་སྡེ་ནི་ལོ་གྲངས་བརྒྱ་ཕྲག་མང་པོའི་རིང་ལ་སུས་ཀྱང་སྲིད་ཀྱི་དབང་ཡུལ་དུ་བྱེད་མ་ནུས་ཤིང་། ཡུལ་དེ་ནི་གངས་རི་དང་རྫ་བྲག་མང་པོས་བར་དུ་ཆོད་པའི་ས་བཙན་དུ་འབྲོག་མི་རྣམས་རང་ཁ་རང་འཚོའི་ཐོག་ཁུ་སིམ་དུ་གནས་པའི་མི་སྡེ་ཞིག་རེད།
གསེར་ཐའི་ཡུལ་སྡེ་གྱི་མི་སྡེ་ནི་ནང་ཚན་དུ་དབྱེ་ན་ཚོ་ཁག་ཆེ་ཆུང་བཅོ་བརྒྱད་དུ་ཡོད་པར་གྲགས་ཤིང་། དེ་དག་ནི“གསེར་གྱི་འབྲོང་རི་སྨུག་པོ”ཞེས་བྱ་བ་དཔལ་ལེགས་ལྡན་ཚོགས་ཀྱི་བདག་པོའི་བླ་རི་ཡིན་པར་གྲགས་པའི་རི་བོ་ཅཱང་ལ་མཛེས་བརྗིད་ཆེ་བ་ཞིག་ཡོད་འདུག་པ་དེའི་ཉེ་སྐོར་གྱི་སྤང་ཐང་དང་། རི་ལུང་རྣམས་སུ་ཆགས་ཡོད་པ་རེད། གནས་རི་ཆེན་པོ་དེ་དང་ཉེ་བའི་སར་གསེར་ཐའི་ཡུལ་གྱི་དཔོན“ཝ་ཤུལ”ཞེས་པ་མགོན་པོ་ཚོགས་བདག་གི་སྤྲུལ་པའི་གདུང་རྒྱུད་ཡིན་པར་གྲགས་པ་དེ་གསེར་ཐའི་ཡུལ་སྡེའི་མཆོད་གནས་སམ་རྒན་པོའི་ཚུལ་དུ་ཡོད་འདུག་གསེར་ཐའི་ཡུལ་སྡེ་མི་སྡེ་ཐམས་ཅད་དཔོན་དེའི་མངའ་འོག་ཏུ་ཚུད་པ་དང་། མི་སྡེ་དག་གིས་ཀྱང་དཔོན་ལ་རྩིས་ཐང་ཤིན་ཏུ་ཆེ་བར་བྱེད་འདུག་ནའང་། དཔོན་གྱི་གོ་གནས་སུ་རང་ཉིད་ཀྱི་མངའ་འབངས་ལ་ཐད་ཀར་བཀའ་བཀོད་གནང་བ་དང་། དཔྱ་ཁྲལ་འགེལ་བ་དང་། ནག་ཉེས་ཅན་དག་ལ་བཀའ་ཁྲིམས་གཏོང་བ་ལ་སོགས་པ་ཡུལ་གཞན་དག་གི་དཔོན་པོ་དག་གི་ཚད་དབང་ལྟ་བུ་གང་ཡང་མི་འདུག དེ་ཡང་གསེར་ཐའི་མི་སྡེ་དཔོན་ལ་རྩིས་ཐང་ཞན་པའི་རྒྱུ་མཚན་གྱིས་དཔོན་ལ་དཔོན་གྱི་ཚད་དབང་མེད་པ་ཞིག་མ་རེད། དེ་ནི་གསེར་ཐའི་མི་སྡེ་གནའ་ནས་ད་ལྟའི་བར་དུ་དཔྱ་ཁྲལ་གྱི་ལམ་སྲོལ་རྩ་བ་ནས་ངོ་མི་ཤེས་ཤིང་། འབྲོག་མི་རེ་རེ་བཞིན་རང་དབང་བཅོས་མ་མ་ཡིན་པ་རེ་ལ་རྒྱུན་རིང་དུ་གོམས་འདྲིས་ཕྱིན་པར་བརྟེན་མི་སྡེའི་གཞི་རྩའི་གནས་ཚུལ་ཡུལ་གཞན་དག་ལས་ཆེས་ཐ་དད་པར་སྣང་ངོ་། །
ཝ་ཤུལ་གྱི་གདུང་རྒྱུད་ཐོག་མར་ཇི་ལྟར་བྱུང་བའི་སྐོར་ཁོ་བོས་ངེས་ཤེས་ཐུབ་པ་མ་བྱུང་ནའང་། གསེར་ཐའི་ཡུལ་སྡེ་གྱི་ཡུལ་སྡེའི་དཔོན་གྱི་མཚན་དབང་གཙོ་བོ་ནི“དཔོན་བླ”ཞེས་བྱ་བ་དེའི་དུས་སུ་བྱུང་ཡོད་པར་སྣང་ཞིང་། དཔོན་བླ་ནི་གསང་སྔགས་སྔ་འགྱུར་རྫོགས་ཆེན་པའི་རྣལ་འབྱོར་རྫུ་འཕྲུལ་དང་ལྡན་པ་ཞིག་ཡིན་པ་དང་། དེར་མ་ཟད་དཔལ་ལེགས་ལྡན་ཚོགས་ཀྱི་བདག་པོའི་སྤྲུལ་པའི་གཏེར་སྟོན་ཞིག་ཡིན་པའི་ལོ་རྒྱུས་མང་དུ་སྣང་བ་དང་། ཁོང་གིས་མགོན་པོའི་བླ་རི་ནས་གཏེར་དུ་བཞེས་པ་མགོན་པོ་ཚོགས་བདག་གི་བེར་ནག་ངོ་མཚར་དང་ལྡན་པ་ཞིག་དེང་དུས་ཀྱང་ཝ་ཤུལ་གྱི་ནང་རྟེན་དུ་ཡོད་འདུག་ཅིང་། ཡུལ་མི་དག་གིས་བརྗོད་གསལ་དུ། ཕྱི་ཡུལ་གྱི་དགྲ་དག་གིས་གསེར་ཐའི་ཡུལ་སྡེ་ལ་ཚུར་འགེལ་གཏན་ནས་བྱེད་ཐུབ་ཀྱི་མ་རེད། གལ་ཏེ་གསེར་ཐའི་ཡུལ་སྡེ་ལ་དགྲ་ཚུར་འགེལ་ཞིག་བྱུང་ན། ང་ཚོས་མགོན་པོ་ཚོགས་བདག་ལ་འཕྲིན་བཅོལ་ཞུ་ཞིང་མགོན་པོའི་བེར་ནག་དགྲ་ཕྱོགས་སུ་གཡབ་པས་དགྲ་ཐམས་ཅད་བཟློག་ཐུབ་ཀྱི་རེད། སྔོན་ཟི་ལིང་གི་དམག་སྔོན་རྗེས་གཉིས་དང་སི་ཁྲོན་གྱི་དམག་ཐེངས་གཅིག་བཅས་ཚུར་འགེལ་བྱུང་བའི་ཚེ་ང་ཚོས་ལེགས་ལྡན་ལ་འཕྲིན་བཅོལ་ཞུས་ཤིང་མགོན་པོའི་བེར་ནག་གཡབ་ནས་བཟློགས་པ་རེད།ཅེས་ཟེར་སྲོལ་འདུག་ཅིང་། ཟེར་བ་ཙམ་དུ་མ་ཟད་ཡུལ་མི་དག་གིས་དོན་དེ་ལ་སྙིང་ཐག་པ་ནས་ཡིད་ཆེས་བྱེད་ཀྱི་ཡོད་འདུག དཔོན་བླའི་གདུངས་སྲས་ཀརྨ་རྡོ་རྗེ་དང་། དེའི་སྲས་སྐལ་བཟང་མགོན་ཡིན་འདུག་ཅིང་། ཁོང་གི་མཐོང་ཡུལ་དུ་འབྲོག་མི་དཀྱུས་མ་ལྟ་བུ་ཞིག་ལས་ཆོས་དང་འཇིག་རྟེན་གཉིས་ཕྱོགས་ཀྱི་སྤྱོད་ཚུལ་མི་འདྲ་བ་གང་ཡང་མི་འདུག གསེར་ཐའི་ཡུལ་མི་དག་གིས་ནམ་རྒྱུན་དུ་དཔོན་གྱི་ཕྱག་དབང་ལེན་པ་དང་། བྱ་བ་བཟང་ངན་གང་འབྱུང་གི་ཕྱ་མོ་ཞུ་བ་དང་། གཞན་ཡང་གསོན་པོའི་སྐྱབས་འཇུག་དང་། གཤིན་པོའི་བསྔོ་བ་སོགས་དད་གུས་ཞུ་ཡུལ་བྱིན་རླབས་ཅན་གྱི་བླ་མ་བཟང་པོ་ཞིག་ལྟར་བརྩི་བཀུར་བྱེད་ཀྱི་ཡོད་པ་རེད།
ཡུལ་དེར་མི་སེར་ཧ་ཅང་ཉམ་ཐག་བཟའ་བཏུང་གྱོན་གོས་ཀྱིས་ཕོངས་པ་དང་། སློང་མོ་བྱེད་མཁན་ནི་གཏན་ནས་མ་མཐོང་ཞིང་། ཚོད་མེད་པའི་སྒེར་པ་ཆེན་པོའང་མཐོང་དུ་མི་འདུག ཕྱུག་དབུལ་འབྲིང་ཙམ་གྱི་མི་ཚང་ཞིག་ལ་ཆ་མཚོན་པ་ཡིན་ན། སྒོ་ནོར་དུ་ལུག་ལྔ་བརྒྱ་ནས་སྟོང་ཕྲག་རེ་ཙམ་དང་། འབྲི་གཡག་སུམ་བརྒྱ་ནས་བདུན་བརྒྱའི་བར་ཙམ་དང་། རྟ་དྲེལ་སུམ་ཅུ་ནས་བདུན་ཅུའི་བར་ཙམ་རེ་ཡོད་འདུག་ཅིང་། དེ་ནི་མི་སྡེ་མང་ཆེའི་གནས་ཚུལ་གྱི་དབང་དུ་བྱས་པ་ཡིན་ཞིང་། གོང་གསལ་གྱི་གྲངས་ཚད་དེ་ལས་མང་བའམ། ཡང་ན་དེ་ལས་ཉུང་བའི་མི་ཚང་ཡང་མང་དུ་ཡོད་པ་རེད།
ཡུལ་དེ་དག་ཏུ་དཔོན་པོའི་བཀའ་དྲག་པོ་འགྲོ་ཡུལ་གཏན་ནས་མེད་ནའང་། འབྲོག་མི་རང་རིགས་ཀྱི་ཆོས་བརྒྱུད་སྐྱོང་བའི་བླ་མ་དག་གི་ཆོས་མཐུན་གྱི་བཀའ་གང་གནང་བ་ནི་ནམ་ཡང་འགལ་དུ་འཇུག་སྲོལ་མི་འདུག་ཅིང་། དེར་མ་ཟད་འབྲོག་མི་དག་གིས་ནམ་རྒྱུན་དུ་བན་དེའི་རིགས་ཚང་མ་ལ་བརྩི་གུས་ཧ་ཅང་ཆེན་པོར་བྱེད་ཀྱི་ཡོད་འདུག་པ་དཔེར་ན། བན་དེ་གྲྭ་ཆས་གྱོན་པ་ཞིག་དང་འབྲོག་མི་རྟ་ཞོན་པ་ཁ་ཤས་བཅས་ལམ་ཁར་འཕྲད་པ་ཡིན་ན། འབྲོག་མི་དེ་དག་གིས་བན་དེ་བཟང་ངན་དང་རྒན་གཞོན་སོགས་ལ་མ་ལྟོས་པར་གུས་པའི་རྟགས་སུ་ཞྭ་མོ་འཕུད་དེ་འགྲོ་བ་རྒྱུས་ཡོད་པའི་བན་དེ་རྒན་རིམ་ཞིག་ཡིན་པར་མཐོང་ན་འབྲོག་མི་དེ་དག་རྟ་ལས་བབས་ཤིང་ཞྭ་ཕུད་ཕུལ་ནས་འགྲོ་བ་དང་། གལ་ཏེ་བླ་མ་སྤྲུལ་པའི་སྐུའམ་མཁན་པོ་སོགས་ན་བཟའ་སེར་པོ་བཞེས་པ་དང་། ཡང་ན་ཆིབས་ལ་གདོམ་ཡོད་པ་ཞིག་འབྱོན་པར་མཐོང་ན། འབྲོག་མི་དག་ནི་དེ་མ་ཐག་ཏུ་རྟ་ལས་བབས་ཤིང་གོས་ཀྱི་ཕུ་དུང་ཕྲག་གོང་དུ་ལེན་པ་དང་། མགོ་ནས་ཞྭ་མོ་ཕུད་ཅིང་། རྒྱབ་ནས་མེ་མདའ་སྔོན་དུ་ལེན་ཞིང་ཞྭ་མོ་དེ་མེ་མདའི་ཁར་བཀལ་བ་དང་། སྐེད་ནས་གྲི་རིང་ཤུབ་དང་བཅས་པ་བཏོན་ཏེ་གྲི་དང་མེ་མདའ་ལྷན་དུ་ལག་གཡོན་པའི་ནང་དུ་འཁྱུད་ཅིང་ཕྱག་དབང་ལེན་སྲོལ་ཡོད་པ་རེད།
བྱང་འབྲོག་གི་མི་སྡེ་དེ་དག་ལ་ཧོབ་ཏུ་བལྟས་པ་ཡིན་ན་ཧ་ཅང་གླེན་པ་དང་རང་གཤིས་གྱོང་པོ་ལྟ་བུ་ཞིག་མཐོང་གི་འདུག གང་ལགས་ཤེ་ན། དེ་དག་གིས་མིས་བཅོས་པའི་སྒྲིག་ལམ་དང་བཀའ་ཁྲིམས་ཀྱི་རིགས་གང་ཡང་ཁུར་མ་མྱོང་བ་དང་། དེ་དག་ལ་ཁྲིམས་སྲོལ་དང་མཐུན་པའི་སློབ་སྦྱོང་གང་ཡང་མེད་པར་བརྟེན་མ་བཅོས་རྣལ་མའི་མི་སྤྱོད་ལས་གཞན་པ་མཐོང་དུ་མེད་པ་རེད། འོན་ཀྱང་ང་ཚོས་ཤོད་ཆོག་པ་ཞིག་ལ། འབྲོག་མི་དེ་དག་གི་རང་གཤིས་དངོས་མ་ནི་མཐོང་སྣང་གི་གླེན་པ་ལྟ་བུ་དེ་ལས་ཆེས་ཐ་དད་ཡིན་ཏེ། དེ་དག་ནི་བསམ་པ་བཟང་ཞིང་བློ་ཁོག་དྲང་བ་དང་། བྱ་བ་ཆེ་ཕྲ་མཐའ་དག་བདེན་པའི་དོན་ལ་བརྟེན་ནས་སྒྲུབ་ཀྱི་ཡོད་པ་རེད། འབྲོག་མི་གྲོགས་པོར་གྱུར་པ་དག་ནི་རྟག་པར་སྙིང་ཐག་པ་ནས་ཡིད་བརྟན་བྱེད་ཆོག་པ་ཤ་སྟག་ཡོད་འདུག་ཅིང་། དེ་དག་གིས་གྲོགས་པོ་ཕན་ཚུན་བར་དང་། མི་སྡེའི་ནང་ཕན་ཚུན་བཅས་པར་གཡོ་སྒྱུ་དང་། མགོ་བསྐོར། བསླུ་བྲིད་སོགས་མདོར་ན་མི་དྲང་བའི་བ་སྤྱོད་ངན་པའི་རིགས་དངོས་ལྐོག་གཉིས་ཆ་ནས་བྱེད་སྲོལ་མེད་པ་རེད། འབྲོག་མིའི་རང་གཤིས་ནི་ཐོག་མར་འདྲིས་པར་དཀའ་ཞིང་། འདྲིས་ཟིན་པའི་རྗེས་སུ་ཡིད་བརྟན་ཐུབ་ཅིང་འདྲིས་ཐག་རིང་བ་དང་། འབྲོག་མི་དག་གིས་དགོས་པ་བྱུང་ན་རང་རང་གི་གྲོགས་པོའི་དོན་དུ་སྲོག་ལུས་ལོངས་སྤྱོད་ཚང་མ་གཏང་བ་ལའང་འཇིགས་སྣང་མེད་ཅིང་ཕན་ཚུན་གཅིག་ཕན་གཅིག་གྲོགས་བྱེད་སྲོལ་ཡོད་པ་རེད།
དེ་ལྟར་འབྲོག་མི་དག་ནི་མ་བཅོས་རྣལ་མའི་སྤྱོད་ལམ་རྒྱུན་ཆགས་པ་དེ་ལ་བརྟེན་ནས་གནའ་ནས་ད་ལྟའི་བར་དུ་མི་སྡེའི་ཚོ་ཟིན་པ་དང་། ཡུལ་གཞན་གྱི་རོགས་རམ་ལ་མ་ལྟོས་པར་རང་རང་གི་འཚོ་བ་བདེ་སྐྱིད་དང་ལྡན་པར་སྐྱེལ་ཐུབ་པ་རེད། གོང་གསལ་གྱི་གནས་ཚུལ་དེ་དག་ནི་ཁམས་བྱང་རྒྱུད་ཀྱི་འབྲོག་མི་ཕལ་ཆེར་འདྲ་བར་སྣང་ཞིང་། འཆད་འགྱུར་གྱི་ལེ་ཚན་དག་ཀྱང་ཁམས་བྱང་རྒྱུད་ཀྱི་འབྲོག་སྡེ་ཁག་གནས་ཚུལ་འདྲ་བར་སྣང་བས་འབྲོག་ཡུལ་སྤྱིར་བཏང་གི་སྒོ་ནས་འཆད་པར་བའོ། །