སྤྱི་བདེ་ཅུའུ་ནི་སྤྱི་བདེ་སྡེ་ཁག་གི་རྩ་འཛུགས་ཀྱི་རྣམ་པ་ཞིག་ཡིན་ཞིང་། སྤྱི་བདེ་བྱ་བ་གཙོ་གཉེར་གནང་བའི་སྲིད་གཞུང་འོག་གསར་འཛུགས་བྱས་པའི་འགན་ནུས་ལས་ཁུངས་ཤིག་ཡིན། དེས་ས་གནས་སྲིད་གཞུང་དང་གོང་རིམ་སྤྱི་བདེ་སྡེ་ཁག་འགོ་ཁྲིད་ཉིས་བརྩེགས་ཀྱི་བཀོད་འདོམས་ལ་ཉན་དགོས།
སྤྱི་བདེ་ཅུའུ་རིམ་པ་ལྟར་དབྱེ་ན་ཐད་གཏོགས་གྲོང་ཁྱེར་སྤྱི་བདེ་ཅུའུ་དང་ཞིང་ཆེན་ལྟེ་གནས་གྲོང་ཁྱེར་སྤྱི་བདེ་ཅུའུ། ས་གནས་རིམ་པའི་གྲོང་ཁྱེར་སྤྱི་བདེ་ཅུའུ། རྫོང་རིམ་པའི་སྤྱི་བདེ་ཅུའུ་སོགས་ཡོད་ཅིང་། དམིགས་བཙུགས་ཀྱི་སྤྱི་བདེ་ཅུའུ་ཡིས་ས་གནས་སྲིད་གཞུང་དང་གོང་རིམ་སྤྱི་བདེ་ཐིང་སོགས་ཀྱི་བཀོད་འདོམས་ལ་ཉན་དགོས། སྤྱི་བདེ་སྡེ་ཁག་གི་ཆེས་མཐོའི་ལས་ཁུངས་ནི་སྤྱི་བདེ་པུའུ་ཡིན་ལ། དེས་རྒྱལ་ཡོངས་ཀྱི་སྤྱི་བདེའི་བྱ་བར་དབུ་ཁྲིད་གནང་བ་ཡིན། དེ་ལས་གཞན་སྡེ་ཁག་གཞན་པའི་སྤྱི་བདེ་སྡེ་ཁག་ཀྱང་ཡོད་ལ། དཔེར་ན་ལྕགས་ལམ་སྤྱི་བདེ་དང་ནགས་ཚལ་སྤྱི་བདེ། དམངས་སྤྱོད་མཁའ་འགྲུལ་སྤྱི་བདེ་སོགས་ཡོད།
སྤྱི་བདེ་སྡེ་ཁག་གི་བྱ་བའི་འགན་འཁྲི་ནི་ཁྲིམས་འགལ་ལུགས་འགལ་གྱི་ཉེས་ཅན་ཞིབ་བཤེར་དང་སྔོན་འགོག བཀག་འགོག་བྱེད་པ། འཇིགས་སྐུལ་བྱ་འགུལ་ལ་སྔོན་འགོག་དང་རྡུང་རྡེག་བྱས་ནས་སྤྱི་ཚོགས་བདེ་འཇགས་ལ་སྲུང་སྐྱོང་བྱེད་དགོས་པ་དང་། སྤྱི་ཚོགས་ལ་གནོད་པ་བྱེད་མཁན་བཀག་འགོག་བྱས་ནས་སློབ་གསོ་གཏོང་བ། འགྲིམ་འགྲུལ་དང་མེ་འགོག་མེ་གསོད། ཉེན་ཁའི་དངོས་པོ་སོགས་ལ་དོ་དམ། ཁྱིམ་ཐོ་དང་སྡོད་དམངས་ཐོབ་ཐང་ལག་ཁྱེར། ཕྱི་རྒྱལ་ལ་འགྲོ་བ་དང་རང་རྒྱལ་དུ་ཡོང་བ་སོགས་ཀྱི་ལས་དོན། ཕྱི་རྒྱལ་བ་རང་རྒྱལ་དུ་སྡོད་པ་དང་ཡུལ་སྐོར་དང་འབྲེལ་ཡོད་ཀྱི་ལས་དོན་ལ་དོ་དམ། ས་གནས་གལ་ཆེན་དང་སྒྲིག་བཀོད་ལ་སྲུང་སྐྱོང་། རྒྱལ་ཁབ་ལས་ཁུངས་དང་སྤྱི་ཚོགས་ཚོགས་པ། ཁེ་ལས་ལས་དོན་རྩ་འཛུགས་དང་ཨར་ལས་འཛུགས་སྐྲུན་གལ་ཆེན། བདེ་སྲུང་གི་བྱ་བ་སོགས་ལ་ལྟ་སྐུལ་དང་མཛུབ་སྟོན་བྱ་བ་སོགས་ཡིན།
སྤྱི་བདེ་ཅུའུ་ཡི་ལས་སྒོ་སྟབས་བདེ་ཡི་སྒོ་ནས་དབྱེ་ན་ཉེས་དོན་དང་བདེ་སྲུང་། འགྲིམ་འགྲུལ་དོ་དམ། མེ་གསོད་མེ་འགོག རྒྱལ་མཚམས་བརྒལ་བ། མི་གྲངས་དོ་དམ། རྒྱལ་ནང་གི་བདེ་འཇགས་སྲུང་སྐྱོང་སོགས་ཡོད།
སྤྱི་བདེ་ཞེས་པའི་འབྱུང་ཁུངས་ནི་ཧྥ་རན་སེའི་གསར་བརྗེ་ཆེན་མོའི་དུས་ཀྱི་སྤྱི་བདེ་ཨུ་ཡོན་ལྷན་ཁང་ཡིན་ཞིང་། དེའི་མིང་ཆ་ཚང་ལ་སྤྱི་བའི་བདེ་འཇགས་ཨུ་ཡོན་ལྷན་ཁང་ཞེས་ཟེར།