《འཁྲུངས་དཔེ》ལས། སྐྱེར་བའི་ཤིང་ནི་ཚེར་མ་ཅན། །སྐྱེར་བ་དཀར་བོ་ཞེས་ཀྱང་བྱ། །ཉིན་སྲིབ་གཉིས་ཀའི་མཚམས་སུ་སྐྱེ། །པགས་པ་དངུལ་མདོག་སྙིང་བོ་སེར། །མེ་ཏོག་སེར་ལ་འབྲས་བུ་དམར། ། ཞེས་དང་། 《བཻ་སྔོན》ལས། སྐྱེར་བའི་མིང་དང་འཁྲུངས་དཔེ་སོགས་གོང་དུ་བརྗོད་པའི་འཁྲུལ་སོ་མེད་པ་དེའི་མེ་ཏོག་སེར་པོ་དང་འབྲས་བུ་དམར་པོ་འཁྲུ་བ་གཅོད། ཅེས་དང་། 《ཤེལ་ཕྲེང》ལས། དཀར་པོ་ལོ་མ་དང་སྡོང་བོ་ཆེ། མེ་ཏོག་སེར་སྐྱ་ཕྱི་ལྤགས་དཀར་བ་ཤུན་པ་སེར་ལ་མཐུག་པ། ཞེས་གསུངས་སོ། །
《ཤེལ་ཕྲེང》ལས། དཀར་བོ་ལོ་མ་དང་སྡོང་བོ་ཆེ། །མེ་ཏོག་སེར་སྐྱ་ཕྱི་ལྤགས་དཀར། །བར་ཤུན་སེར་ལ་མཐུག ཅེས་དང་། 《སྔོ་སྨན་གྱི་འཁྲུངས་དཔེ་བསྡུས་པ་ངོ་མཚར་གསེར་སྙེར》ལས། ལྤགས་མདོག་གིས་དབྱེ་བའི་སྐྱེར་པ་དཀར་པོ། སྐྱེར་པ་ནག་པོ་སྡོང་པོ་ཆུང་ངོ་། ། ཞེས་གསུངས་པ་ལྟར། སྤྱིར་བཏང་སྐྱེར་པ་ལ་རིགས་དཀར་ནག་གཉིས་ཡོད་པ་ལས། དཀར་པོ་ལོ་མ་དང་སྡོང་བོ་ཆེ་ལ་ཕྱི་པགས་དཀར། མེ་ཏོག་སེར་སྐྱ། བར་ཤུན་སེར་ལ་མཐུག ནག་པོ་ཕྱི་པགས་ནག་ལ་ལོ་སྡོང་ཆུང་ཞིང་མེ་ཏོག་སེར་ཁ་ཆེ།
རང་ས་གནས་དང་། བལ་ཡུལ། འབྲས་ལྗོངས། རྒྱ་གར་ཀྱི་ཀུརྨའ་རི་རྒྱུད། ཧི་མ་ལ་ཡའི་མངའ་སྡེ་སོགས་སའི་མཐོ་ཚད་རྒྱ་མཚོའི་ངོས་ལས་སྨི1230ནས3770བར་གྱི་རི་ཀླུང་གདགས་སྲིབ་གང་རུང་དང་། ཤིང་ནགས་ཀྱི་གསེབ། གྲོང་གི་ཉེ་འགྲམ། ལམ་ཟུར་སོགས་སུ་སྐྱེ་བ་མང་།
སྤྱི་ཟླ་ལྔ་བ་དང་དྲུག་པར་མེ་ཏོག་འཐུ་སྒྲུབ་བྱས་ཏེ་བསིལ་སྐམ་བྱ་དགོས་པ་དང་། རྩ་བ་དང་བར་ཤུན་གཉིས་དཔྱིད་ཀ་བཏུ་དགོས་པ་དང་། འབྲས་བུ་སྤྱི་ཟླ་དགུ་བའི་ནང་བཏུས་ཏེ་མ་རུལ་བར་སྐམ་ནས་སྤྱོད་དགོས་པ་དང་། བར་ཤུན་ནི་ཡལ་གའི་ཕྱི་པགས་དོར་ཏེ་ཤ་གདན་དང་ཕྱི་པགས་པ་སེར་ཞིང་དྭངས་པ་བཤུས་ནས་སྐམ་སྟེ་སྤྱོད་པ་དང་། རྩ་བ་གཙང་མ་འཀྲུས་རྗེས་གཏུབ་ནས་ཁཎྜ་བཟོ་དགོས།
རོ་ཁ་བ། ཞུ་རྗེས་ཁ་བ། ངོ་བོ་བསིལ་བ། 《བདུད་རྩི་སྨན་གྱི་འཁྲུངས་དཔེ》ལས། རྩ་བ་དང་བར་ཤུན་གྱི་རོ་ཁ་བ་དང་། ཞུ་རྗེས་ཁ་བ། ནུས་པ་བསིལ་ལ་རྩུབ་པ། མེ་ཏོག་གི་ཏོ་མངར་ལ་བསྐ་བ་དང་། ཞུ་རྗེས་ཁ་བ། ནུས་པ་བསིལ་བ། འབྲས་བུའི་རོ་སྐྱུར་ལ་ཁ་བ། ཞུ་རྗེས་སྐྱུར་བ། ནུས་པ་བསིལ་བའོ། །
དུག་ནད་བྱེར་བ་བསྡུ་བ་དང་། པགས་ནད་ཀྱིས་ཆུ་སེར་རྒྱས་པ། མིག་སྤྲིན་ལ་གཉན་ཚད་རྒྱས་ནས་དམར་བོ་ཆགས་པ། ཤ་མཛེར་དང་ལང་ཐོག་ཐོན་པ། ཁའི་ནང་རྨ་ནང་སྐྱེས་པ། གྲེ་བ་དང་གློ་མིག་ལ་གཉན་ཁ་རྒྱས་པ། རྒྱུ་མར་གཉན་ཚད་རྒྱས་ནས་ཁོག་པ་བཤལ་བ། ཁྲག་དང་གྲང་འཛག་ནས་གཅིན་ལམ་ལ་ཚ་ཤར་རྒྱག་པ། མཁྲིས་ནད་སོགས་ལ་ཕན་པ་དང་། མེ་ཏོག་དང་འབྲས་བུས་ཚད་འཁྲུ་གཅོད་པ་དང་། དུག་ནད། རིམས་རྙིང་བ། མིག་ནད་ཐམས་ཅད་ལ་ཕན།
སྐྱེར་ཤུན་བརྒྱད་པ། སྐྱེར་ཤུན་པི་ལིང་སྐྱུ་རུ་ཤིང་མངར་དང་། གླ་རྩིའི་དྲིས་བསྒྱུར་སྐྱེར་ཤུན་ལྔ་བའི་སྟེང་། གུར་གུམ་དོམ་མཁྲིས་རྒྱ་སྣག་བསྣན་པ་འདིས། ཆུ་བཙག་རྗེས་ལ་ཆུ་ཁ་ཚ་ཙག་བྱེད། སག་བོན་ཁྲག་བསྡོངས་འཛག་པའི་གཉེན་པོ་སྟེ། ཁྲག་མཁྲིས་ལས་གྱུར་ཚ་འཛག་ནད་ཀུན་སེལ།