གློག་བརྙན་འདིའི་ནང་དུ་ལོ་རབས20པའི་ནང་། ཨ་རིའི་ཉིག་ཡོ (New York)གྲོང་ཁྱེར་གྱི་ཉེན་རྟོག་སྡེ་ཁག་ག་གེ་མོར་ནག་ཚོགས་སྐོར་ཞིག་གིས་ཆང་རག་ལྐོག་འཚོང་བྱེད་པའི་གསང་བ་ཡར་ཞུ་བྱས་ཤིང་། དེ་མར་ཉེན་རྟོག་པ་ཚོ་སྔོག་བཤེར་ཏུ་ཕྱིན་ནས་མེ་མདས་ཁོ་ཚོ་ལྔ་ལམ་དུ་བརྫངས་ཀྱང་། མིང་ལ་ཐུག་པ(noodles)ཟེར་བའི་མི་དེ་གཅིག་པུ་བྲོས་ཤོར་ཐུབ་པ་བྱུང་ཞིང་། ཁོ་ནི་ཏག་ཏག་གསང་བ་ཡར་ཞུ་བྱེད་མཁན་དེ་ཡིན་འདུག ཁོས་དང་ཐོག་བསམས་པར་གྲོགས་པོ་ཚོའི་སྤྱོད་ངན་སྔོན་འགོག་བྱེད་ཨེ་ཐུབ་སྙམ་པ་ཡིན་ཡང་ལས་བསམ་སར་མ་སོང་གསེག་སར་སོང་སྟེ་ཁོའི་གྲོགས་པོ་ཚོའི་ཚེ་སྲོག་ཤོར་བས། ཁོ་རང་ནོངས་འགྱོད་དང་གདུང་བ་ཆེན་པོ་སྐྱེ་ཞོར་ཉིག་ཡོག་(New York)དང་ཁ་བྲལ་ནས་ཆུང་དུས་འཚར་ལོངས་འབྱུང་སའི་གནས་དེར་ཕྱིར་ལོག ལོ་ངོ་སུམ་ཅུ་འཁོར་བའི་རྗེས་ལ་ཐུག་པ་ཉིག་ཡོར་ཡོང་དུས་ཁོའི་གྲོགས་པོའི་གྲས་ཀྱི་མིང་ལ་མེལ་ཁི་སི(Max)ཟེར་བ་དེ་ཤི་མེད་པར། དོན་ངོ་མར་སྐབས་དེ་དུས་མེལ་ཁི་སིས་ཉེན་རྟོག་པ་ལག་རོགས་སུ་བཀོལ་ནས་རང་གི་གྲོགས་པོ་ཚོ་གཡོ་འཚོང་བྱས་པ་དང་། ཁོ་ཚོའི་ཐུན་མོང་གི་གསོག་དངུལ་འབོར་ཆེན་དེ་སྤྱད་ནས་ཁོ་རང་གོ་སར་འཛེགས་ཐབས་བྱས་པའི་ལྐོག་ཇུས་དྲན་པ་ཡིན་པས། ཐུག་པ་ཡིས་དོན་རྐྱེན་དེའི་རྒྱབ་ལྗོངས་སུ་དེ་ལྟར་བསམ་ཡུལ་ལས་འདས་པའི་ལྐོག་གཡོ་ཞིག་གནས་ཡོད་པ་ཤེས་ཏེ། ཉེས་པ་འབའ་ཞིག་གིས་སྦགས་ཡོད་པའི་གྲོགས་པོ་དེ་དང་གཏན་བྲལ་བྱས་ཤིང་། མེལ་ཁོ་སི་ཡིས་རང་ཉིད་ཀྱི་ཚེ་སྲོག་གི་མཇུག་བསྡུས་པ་དེའོ།།
གཞོན་པ།--རྒས་པ།--ན་ཆུང་།--རྒན་པ།--གཞོན་པ།--རྒན་པ།--གཞོན་པའི་གོ་རིམ་འདི་ནི་ཨ་རིའི་འདས་དོན་གྱི་ལྷུག་བརྗོད་གོ་རིམ་ཡིན་ལ། གློག་བརྙན་འདིས་མ་གཞི་ནས་མི་ཚེ་ཧྲིལ་བོ་ཞིག་མཚོན་ཐུབ་བྱས་ཡོད་པར་གཞིགས་ན་དུས་ཚོད་ཀྱིས་ལྷུག་བརྗོད་ཀྱི་གོ་རིམ་ཧྲིལ་བོར་བརྡ་རྟགས་ཀྱི་ནུས་གོ་ཆོད་འདུག་སྟེ། མི་སྣའི་ན་ཚོད་ཀྱི་འགྱུར་བ་དང་བསྟུན་ནས་མཐའ་འཁོར་གྱི་ཡོད་ཚད་འགྱུར་གྱིན་པ་དང་། འགྱུར་བའི་རྣམ་པ་དེ་དུས་ཚོད་ཀྱི་བརྡ་རྟགས་ལ་བརྟེན་ནས་གོ་མཚམས་གསལ་བོ་རེ་དབྱེ་ཡོད་པས། གློག་བརྙན་འདི་རྩོམ་རིག་བརྩམས་ཆོས་ཤིག་ཡིན་པའི་ངོས་ནས་བཤད་ན་ཁྱད་ཆོས་འབུར་དུ་ཐོན་ས་གཅིག་ནི་ལྷུག་བརྗོད་བྱེད་སྟངས་ཀྱི་མཉེན་འགུག་ཁྲོད་ན་མངོན་འདུག་སྟེ། དགོས་དབང་གིས་དོན་དག་མང་པོ་ཞིག་བར་བཅུག་གིས་བརྗོད་པ་དེས་གློག་བརྙན་ཧྲིལ་བོའི་བརྗོད་དོན་གཟིགས་པོའི་སྤྱན་སྔར་བསྟར་ཐུབ་པར་བྱས་ཡོད། ད་དུང་ཁྱད་ཆོས་གཞན་ཞིག་ནི་མི་སྣ་བཀོད་སྒྲིག་གི་ཐོག་ནས་མངོན་འདུག་སྟེ། གློག་བརྙན་ནང་གི་ཕོ་གསར་དྲུག་པོ་དེ་དག་ཁོ་ཚོ་རང་རང་གི་རང་གཤིས་ཀྱི་ཚབ་བྱེད་དུ་བཞེངས་ཤིང་དེའི་ཐོག་ལ་རང་གཤིས་མི་འདྲ་བའི་བུད་མེད་གསུམ་བསྣན་པས་གློག་བརྙན་ཧྲིལ་བོའི་བརྙན་རིས་གྲུབ་འདུག་ལ། བརྙན་རིས་དེ་དག་ལས་མི་ཚེ་དང་མིའི་འཚར་ལོངས་ཀྱི་གོ་རིམ་ཧྲིལ་བོ་ཞིག་མཐོང་ཐུབ་པས་གློག་བརྙན་གྱི་བརྗོད་དོན་ཡང་ལྷུན་ཆགས་དང་ཁྱད་ཆོས་ཅན་ཞིག་ཏུ་བསྒྱུར་ཡོད།