ཡང་ཆིན།སྔ་མའི་པར་གཞི་དེ ལྷ་བྷེ། ནས 2016-01-30 11:11ལ་འགྲུབ།
ཡང་ཆིན།
ཡང་ཆིན།
ཡང་ཆིན་ནི་རྒྱུད་རྡུང་རོལ་མོའི་རྣམ་གྲངས་ཤིག་སྟེ། «ཀྲུང་གོའི་རོལ་མོའི་ཚིག་མཛོད» ཅེས་པའི་རྒྱ་ཡིག་གི་དཔར་མའི་ཤོག་ངོས450ནང་དེའི་མིང་གི་རྣམ་གྲངས་ལ་དྷ་ཆིན（打琴）ཞེས་ཟེར། དེའི་སྔོན་གྱི་གཟུགས་ནི་པར་སིག་དང་ཨ་རབ་རྒྱུད་དུ་དར་སོ་ཆེ་བའི་གནའ་རབས་རྒྱུད་རྡུང་རོལ་མོ་ཡིན་སྐད་ཅེས་བྱུང་འདུག
1
བྱུང་བ།
ཡང་ཆིན་ནི་རྒྱུད་རྡུང་རོལ་མོའི་རྣམ་གྲངས་ཤིག་སྟེ། «ཀྲུང་གོའི་རོལ་མོའི་ཚིག་མཛོད» ཅེས་པའི་རྒྱ་ཡིག་གི་དཔར་མའི་ཤོག་ངོས450ནང་དེའི་མིང་གི་རྣམ་གྲངས་ལ་དྷ་ཆིན（打琴）ཞེས་ཟེར། དེའི་སྔོན་གྱི་གཟུགས་ནི་པར་སིག་དང་ཨ་རབ་རྒྱུད་དུ་དར་སོ་ཆེ་བའི་གནའ་རབས་རྒྱུད་རྡུང་རོལ་མོ་ཡིན་སྐད་ཅེས་བྱུང་འདུག དེ་ལྟར་ཨ་རབ་ཡུལ་གྲུར་དར་ཁྱབ་ཆེ་བའི་དམིགས་བསལ་རོལ་མོ་ཆན་ལུན་ཞེས་པ་སྐས་དབྱིབས་གཟུགས་ཅན་དེར་དཔེ་བལྟས་ནས་རིག་པས་བསྐྲུན་པ་ཞིག་ཡིན་པ་གོར་མ་ཆག དེ་ཡང་སྤྱི་ལོའི་དུས་རབས་བཅུ་བདུན་པའི་ནང་དུ་ཀྲུང་གོའི་ལྷོ་ཕྱོགས་མཚོ་རྒྱུད་ས་ཁུལ་གྱི་ཀོང་ཏུང་སོགས་སུ་ཐོག་མར་དར་ཞིང་དེ་ནས་རིམ་བཞིན་པེ་ཅིང་། སི་ཁྲོན། ཡུན་ནན་སོགས་རྒྱ་ནག་གི་ས་ཆ་རྣམས་སུ་དར་ཁྱབ་བྱུང་སྟེ་ཟློས་གར་དང་གཞས་མ་གཏམ་གྱི་རམ་དཀྲོལ་རོལ་ཆ་གལ་ཆེ་གྲས་ཤིག་ཏུ་གྱུར་ཞིང་། འཆད་གྱེར་སྒྱུ་རྩལ་གྱི་རྣམ་གྲངས་འགའ་རེར་ཡང་ཆིན་གྱི་མིང་འབྲེལ་བྱུང་པ་སྟེ་སི་ཁྲོན་ཡང་ཆིན་དང་ཡུན་ནན་ཡང་ཆིན་ཟེར་བ་ལྟ་བུ་མང་། རང་རེའི་བོད་ལ་ཆ་བཞག་ན། ཡང་ཆིན་ཞེས་པའི་རོལ་མོའའི་རྣམ་གྲངས་འདིའི་སྲོལ་འབྱེད་པ་པོ་ནི་རྡོ་རིང་བསྟན་འཛིན་དཔལ་འབྱོར་མཆོག་ཡིན་ཏེ། ཁོང་ཉིད་ཀྱིས་མཛད་པའི«དགའ་བཞི་བའི་མི་རབས་བྱུང་བ་བརྗོད་པ་ཟོལ་མེད་གཏམ་གྱི་རོལ་མོ» ཞེས་པ་ལས། རྒྱ་ནག་འདི་ཀླུའི་རིགས་ལ་སོང་གཤིས་འབྱོར་བ་ཆེ་ཞིང་ལྟད་མོའི་རྣམ་གྲངས་མང་པ། ལྷག་དོན་རོལ་མོའི་བྱེ་བྲག་སྣ་ཚོགས་དེ་ཀུན་གདངས་འགྱུར་སྙན་ཞིང་ཤིན་ཏུ་ངོ་མཚར་ཆེ་བ་འདུག་སྟབས། དེ་སྔ་ཕན་བོད་དུ་མ་དར་བའི་རོལ་དཔྱད་གྲས་དབང་པོ་ལག་པའི་དབྱིབས་ཅན་རྒྱ་སྐད་དུ་ཞིང་ཟེར་བ་ཡང་བརྔས་འཁྲི་འདྲ་བ་རྒྱ་སྐད་དུ་ཡན་ཅིན་ཟེར་བ་དེ་གཉིས་ཀྱི་སྐད་གནས་འཚོལ་ལུགས་ནས་བཟུང་། གདངས་འགྱུར་གྱི་བར་སློབ་སྦྱོང་བྱས་དུས་ཡན་ཆིན་གཏོང་ལུགས་ཧ་ལམ་ཤེས་ནས། ཤིང་དུ་འབོད་པ་དེ་བསླབ་འགོ་ཚུགས་ཙམ་ལ་ཁོ་བོ་ལ་འབྲུམ་པས་ན་པས། བསླབ་མ་ཐུབ། དེང་དུས་བོད་དུ་མངའ་རིས་སྒྲ་སྙན་དང་ལྷན་ཅིག་རྒྱའི་ཡན་ཆིན་དང་། འཕྲེད་གླིང་གཉིས་བཅམས་ནས་གཏོང་སྲོལ་ཐོག་མའི་ལག་ཁྲིད་ཀྱི་རྒྱུན་འཛུགས་པའི་བྱེད་པོ་ནི་ཁོ་བོ་ལགས་ཞེས་བྱུང་བས་ཤེས་ཐུབ་བོ། །དེ་ཡང་རང་རེའི་བོད་དུ་ཡང་ཆིན་ཞེས་པའི་རོལ་མོ་འདི་དར་བའི་དུས་ནི་དུས་རབས་བཅོ་བརྒྱད་པའི་ལོ་རབས་དགུ་བཅུ་བའི་ནང་ཡིན་པ་ཡང་ཤེས་ཐུབ། དེ་ཡང་དུས་དེ་ཙམ་ནས་བཟུང་རང་ཅག་ཁ་བ་རི་པའི་ཡིད་རྣའི་དགའ་སྟོན་འགུག་པའི་རོལ་མོའི་བྱེ་བྲག་ནང་ཡང་ཆིན་ཞེས་པའི་རྒྱུད་མངས་ཕྱེ་མ་ལེབ་དེ་ཉིད་གསར་དུ་འཕར་སྣོན་བྱུང་ཞིང་། ཕྱིས་ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད་ཆུ་ཐིགས་ཆུར་འདྲེས་པ་བཞིན་བོད་ཀྱི་དམངས་ཁྲོད་གླུ་གར་ལས་སྟོད་གཞས་ནང་མའི་རོལ་མོའི་བྱེ་བྲག་གལ་ཆེན་ཞིག་ཏུ་གྱུར་བར་མ་ཟད། གར་དཔོན་པ་སངས་རྒྱས་དོན་གྲུབ་དེ་ཉིད་ཀྱི་དུས་གཞུང་ཞབས་གར་བས་ཀྱང་གར་གྱི་རོལ་མོའི་རྣམ་གྲངས་གྲས་སུ་བཅུག་གོ །
2
བྱུང་ཡུལ།
བོད་ལ་ཡང་ཆིན་གང་ནས་ཡོང་གི་ཡོད་དམ་ཞེས་ན། གཙོ་བོ་རྒྱ་ནག་ལྷོ་ཕྱོགས་ཀྱི་ཡུལ་གྲུ་ཀོང་ཏུང་སོགས་ནས་ཡོང་གི་ཡོད་སྟབས། མ་གནས་རིན་གོང་གང་ཅིའི་ཆ་ནས་ཀྱང་སྐུ་དྲག་དང་ཚོང་བ་འབྱོར་ལྡན་པ་རེ་འགས་མ་གཏོགས་ཉོ་ཐབས་བྲལ། དེས་ན་ཁ་ཆེ་རྒྱ་མི་ཡང་ཡོད་ལ་སྐུ་དྲག་འབྱོར་པ་ཡང་ཐེ་ཞུགས་ཡོད་པའི་དབུལ་ཕྱུག་སྐྱིད་སྡུག་གཅིག་ཏུ་བསྒྲིལ་བའི་དམངས་ཁྲོད་གླུ་གར་སྒྲིག་འཛུགས་ནང་མའི་སྐྱིད་སྡུག་ཙམ་ལས་གཞན་ལ་དར་སོ་མ་བྱུང་། དེ་ཡང་དེ་སྔ་ནང་མའི་སྐྱིད་སྡུག་པ་རྣམས་ཀྱིས་སྟོད་གཞས་ནང་མའི་གཞས་གཏོང་སྐབས་གཟབ་རྒྱས་ལ་སྒྲ་སྙན་ཆེ་འབྲིང་ཆུང་གསུམ་དང་། ཡང་ཆིན་གཅིག དལ་ཆིངས་གཉིས། པི་ཝང་ཆུང་པ་གཅིག གཡེར་ཁ་དང་ཏིང་ཤགས་བཅས་སྒྲིག་སྲོལ་ཡོད་ལ། རོལ་ཆ་སོ་སོའི་ཁྱད་ཆོས་ཆ་ནས་ཀྱང་སྒྲ་སྙན་ནི་ཆུ་ནང་ཉ་མོ་འཁྱུག་ལྟར་དམའ་སར་འཁོར་བ་དང་། ཡང་ཆིན་ནི་དགུང་ཨ་སྔོན་དབྱིངས་སུ་བྱ་རྒོད་པོ་ལྡིང་བ་ལྟར་མཐོ་དམའ་བར་གསུམ་ལ་འཁོར་བ། དལ་ཆིངས་ནི་སྔོ་ལྗང་གོས་ཀྱིས་བཀླུབས་པའི་རི་ལྡེབས་སུ་ཤྭ་བ་སྨུག་ཆུང་ཕར་རྒྱུག་ཚུར་རྒྱུག་བྱེད་པ་ལྟར་སྒྲ་བར་སར་འཁོར་བས་སྐྱེ་བོ་རྣམས་ཀྱི་རྣ་བའི་ཡུལ་ལ་བདེ་བའི་ཉམས་སྣང་སྟེར་གྱི་ཡོད།
3
གྲུབ་ཚུལ།
ཡང་ཆིན་ནི་ཕྱི་འོང་རོལ་མོའི་གྲས་ཤིག་ཡིན་པས་བོད་ལ་དམིགས་བསལ་བཟོ་རྒྱུན་མེད་ན་ཡང་། དེའི་སྤྱིའི་དབྱིབས་དང་བཟོ་བཀོད་ནི། གཞི་རྐང་ཡང་ཆིན་ནི་སྒྲ་སྒམ་དང་། རྒྱུད་སྐུད། གཅུས་གཟེར། སྒ་སོགས་ཆ་ཤས་དུ་མ་ལས་གྲུབ་ཅིང་། སྒྲ་སྒམ་ནི་ཤིང་སྒམ་སྐས་དབྱིབས་ཅན་ཞིག་ཡིན་ལ། རྒྱུད་སྐུད་ཀྱང་ལྕགས་སྐུད་དང་ཟངས་སྐུད་གཉིས་སུ་ཡོད་པ་དང་། གཅུས་གཟེར་ནི་ལྕགས་གཟེར་ཡིན་ཞིང་དེ་ལ་རྟེན་གཟེར་དང་སྒྲིག་གཟེར་གཉིས་སུ་ཡོད་པ་དང་། རྟེན་གཟེར་ནི་སྒྲ་སྒམ་གྱི་གཞོགས་གཡོན་དུ་གནས་ཤིང་རྒྱུད་འདོགས་སའི་མ་རྟེན་ཡིན་ལ། སྒྲིག་གཟེར་ནི་སྒྲ་སྒམ་གྱི་གཞོགས་གཡས་སུ་གནས་ཤིང་དེ་ལ་བརྟེན་ནས་རྒྱུད་སོ་སོའི་སྒྲ་སྒྲིག་པ་ཡིན། དེ་ཡང་སྒྲ་སྒྲིག་སྐབས་ལྡེ་མིག་རྒྱག་དགོས་ལ། ལྡེ་མིག་ནི་སྒྲིག་གཟེར་གྱི་སྦོམ་ཕྲ་དང་འཚམས་པའི་ལྕགས་གུག་གུག་ཅིག་གམ་ཡང་ན་ཤིང་གི་ཨ་མཆོག་ཚག་ལྡན་དེ་འདྲ་ཡོད་འདུག སྲོལ་རྒྱུན་གྱི་ཡང་ཆིན་ལ་ཆ་བཞག་ན། སྒ་སྟར་གཉིས་པ་གཙོ་སྒ་སྒ་མིག་བརྒྱད་ཅན་དང་། སྒྲ་སྟར་གཉིས་པ་གཙོ་སྒ་སྒ་མིག་བཅུ་ཅན། སྒ་སྟར་གཉིས་པ་གཙོ་སྒ་སྒ་མིག་བཅུ་གཉིས་ཅན་སོགས་སྣ་ཚོགས་བྱུང་ལ། ཧ་ལམ་སྤྱི་ལོའི་དུས་རབས་ཉི་ཤུ་པའི་ལོ་རབས་ལྔ་བཅུའི་གཡས་གཡོན་ལ་སྲོལ་རྒྱུན་ཡང་ཆིན་ལ་བསྒྱུར་བཅོས་བྱས་རྗེས་སྒ་སྟར་གསུམ་པ་གཙོ་སྒ་སྒ་མིག་བཅུ་ཅན་དང་། སྒ་སྟར་བཞི་བ་གཙོ་སྒ་སྒ་མིག་བཅུ་གཉིས་ཅན། སྒ་སྟར་བཞི་བ་གཙོ་སྒ་སྒ་མིག་བཅུ་གསུམ་ཅན་སོགས་ཀྱང་བཡུང་བར་མ་ཟད། སྒྲ་སྒམ་གྱི་གཞོགས་གཡས་གཡོན་གཉིས་སུ་སྒྲ་སྙོམས་སྒྲིག་བྱེད་སྤྱད་ཀྱི་ལྕགས་རྡེལ་རྣམས་གནས་སའི་པང་ལེབ་ཀྱི་སྟེགས་བུ་རེ་ཡང་ཡོད་ཅིང་། ལྕགས་ཀྱི་རྡེལ་རིལ་དེ་དག་ལ་བརྟེན་ནས་རྒྱུད་སོ་སོའི་སྒྲ་ཕྱེད་ཀ་ཡས་མས་སྙོམས་སྒྲིག་བྱེད་ཐུབ་ཀྱི་ཡོ། དེ་ཡང་སྒ་སྟར་གཉིས་པ་གཙོ་སྒ་སྒ་མིག་བཅུ་ཅན་གྱི་ཡང་ཆིན་གྱི་སྒྲ་ཁྱབ་ནིd—d3སྟེ་དཀྱུས་རིམ་བརྒྱད་ཅན་གསུམ་ལྡན་ཡིན་ལ། སྒ་སྟར་གསུམ་པ་གཙོ་སྒ་སྒ་མིག་བཅུ་ཅན་གྱི་ཡང་ཆིན་གྱི་སྒྲ་ཁྱབ་ནིd—e3སྟེ་དཀྱུས་བརྒྱད་ཅན་གསུམ་གྱི་ཁར་དཀྱུས་རིམ་ཆེ་བ་གཉིས་ཅན་གཅིག་བསྣན་པ་ཞིག་ཡིན་པ་དང་། སྒ་སྟར་བཞི་བ་སྒྲ་འགྱུར་རང་བཞིན་གྱི་ཡང་ཆིན་གྱི་སྒྲ་ཁྱབ་ནི G—g3སྟེ་དཀྱུས་རིམ་བརྒྱད་ཅན་བཞིན་ལྡན་ལྟ་བུ་ཡིན་ཞིང་། སྤྱིར་ན་ཡང་ཆིན་ལ་སྒྲ་གསུམ་དུ་ཡོད་དེ། སྒྲ་དམའ་ས་ནི་བརྗིད་ཅིང་གྱོང་ལ་བབ་ཆགས་པ་དང་། སྒྲ་བར་ས་ནི་དྭངས་ཤིང་གསལ་ལ་རྣར་འཇེབས་པ་དང་། སྒྲ་མཐོ་ས་ནི་གསལ་ཞིང་འཚེར་ལ་ཡིད་སྣང་སྤྲོ་བ་བཅས་ཀྱི་ཁྱད་ཆོས་ལྡན་ནོ། །
4
རྡུང་སྟངས།
དེ་ལྟ་བུའི་ཡང་ཆིན་དཀྲོལ་གཏོང་བྱེད་པའི་ཚེ་ནའང་བྱེད་པ་པོ་ཉིད་ཀྱི་ལག་གཡས་གཡོན་གཉིས་སུ་ཇན་ཙེ་ཞེས་རྒྱུད་རྣམས་རྡུང་བྱེད་སྨྱུག་ཐུར་རེ་བྲང་ལག་མི་སྦྱོར་བར་ལྷོད་གཡེང་དང་བཅས་པས་གཟུང་དགོས་ལ། རྡུང་པའི་ཚེ་ནའང་ལག་པའི་ཤུགས་གང་ཡོད་ཀྱིས་བརྡུང་ན་སྙན་ཆར་གནོད་སྐྱོན་ཡོང་བས་འཁྲོལ་ཡང་ལྷོད་གསུམ་གྱིས་རྡུང་དགོས་སོ།། དེ་ཡང་ཡང་ཆིན་གྱི་སྐད་སྙན་མི་སྙན་ནི་རྡུང་མཁས་མིན་ལ་རག་ལས་པས་དེ་ལུགས་ཇན་ཙེ་སྟངས་འཛིན་བྱེད་སྟངས་ཁོང་དུ་ཆུད་པར་བྱ་རྒྱུ་གལ་ཆེ་ཞིང་། རྡུང་རྩལ་ལ་ཡང་ཆ་རྡུང་དང་ཡང་རྡུང་། སྐོར་རྡུང་སོགས་སྣ་ཚོགས་ཡོད་དོ། །
དཔྱད་གཞིའི་ཡིག་ཆ།