བན་གོ།སྔ་མའི་པར་གཞི་དེ ཨ་སངས། ནས 2015-10-31 13:53ལ་འགྲུབ།
བན་གོ།
བན་གོ།
ཁོང་ནི་ལྷོ་ནུབ་མི་རིགས་སློབ་ཆེན་གྱི་བོད་རིག་པའི་སློབ་གླིང་གི་འགོ་གཙོ་དང་། རབ་འབྱམས་ཆེན་མོའི་ཞིབ་འཇུག་པའི་མཛུབ་སྟོན་དགེ་རྒན་སོགས་ཀྱི་འགན་བཞེས་ཡོད།
གཞི་རྩའི་གནས་ཚུལ།
རྒྱ་ཡིག་གི་མིང་།
万果
སྐྱེས་ལོ།
སྤྱི་ལོ1962ལོ།
རྒྱལ་ཁབ།
ཀྲུང་གོ།
མི་རིགས།
བོད་རིགས།
སྐྱེས་ཡུལ།
མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་།
ལས་རིགས།
དགེ་རྒན།
ལས་ཐོབ།
དགེ་རྒན་ཆེན་མོ།
མཐར་ཕྱིན་སློབ་གྲྭ།
ནུབ་བྱང་མི་རིགས་སློབ་གྲྭ་ཆེན་མོ།
འཐུས་ཚབ་བརྩམས་ཆོས།
《བོད་ཀྱི་བསྟན་བཅོས་ལས་མིང་གདགས་སྟངས་ལ་དཔྱད་པ》《བོད་ཀྱི་ལོ་རྒྱུས་ལོ་ཙཱ་དང་རིག་གནས་སྣང་ཚུལ་གླེང་བ》
1
ངོ་སྤྲོད།
ཁོང་ནི་སྤྱི་ལོ1962ལོར་མཚོ་སྔོན་ཞིང་ཆེན་མཚོ་ལྷོ་ཁུལ་ཁྲི་ཀ་ས་ཆར་སྐྱེས་ཤིང་། སྤྱི་ལོ1979ལོ་ནས་བཟུང་མཚོ་ལྷོ་ཁུལ་མི་རིགས་དགེ་ཐོན་སློབ་གྲྭ་དང་ནུབ་བྱང་མི་རིགས་སློབ་ཆེན་སོགས་རིམ་བཞིན་འགྲིམས་པ་དང་། སྔ་རྗེས་སུ་རྒན་དོར་ཞི་ལགས་དང་། དགེ་བའི་བཤེས་གཉེན་ཆེན་མོ་དགེ་འདུན་རྒྱ་མཚོ། པཎ་ཆེན་ཡོངས་འཛིན་འཇམ་དབྱངས་རྒྱ་མཚོ། རིགས་པ་འཛིན་པ་དཔལ་ལྡན་རྒྱ་མཚོ་སོགས་ཚུལ་བཞིན་དུ་བསྟེན་ཏེ། དབུ་ཕར་ཚད་གསུམ་དང་། ས་ལམ་གྲུབ་མཐའ་བཅས་ལ་ཧུར་བརྩོན་རྡོ་རུས་ཐུག་པ་མཛད།
ཁོང་ད་ལྟ་ལྷོ་ནུབ་མི་རིགས་སློབ་གྲྭ་ཆེན་མོ་རུ་བོད་རིག་པའི་སློབ་གླིང་གི་འགོ་གཙོ་དང་། རབ་འབྱམས་ཆེན་མོའི་ཞིབ་འཇུག་པའི་མཛུབ་སྟོན་སློབ་དཔོན། སི་ཁྲོན་ཞིང་ཆེན་གྱི་རིག་གཞུང་ཉམས་ཞིབ་པའི་སྣེ་ཁྲིད་ཀྱི་གཙོ་འགན་བཞེས་ཏེ། རྒྱལ་སྲིད་སྤྱི་ཁྱབ་ཁང་གི་ཆེད་གནངས་དངུལ་ཕོག་ལོངས་སུ་སྤྱོད་ཅིང་མཆིས་ལ། སི་ཁྲོན་ཞིང་ཆེན་ཁམས་ཁུལ་རིག་གཞུང་ཞིབ་འཇུག་ལྷན་ཚོགས་ཀྱི་ཚོགས་གཙོ་གཞོན་པ་དང་། བོད་ལྗོངས་སློབ་ཆེན་གྱི་གདན་ཞུའི་དགེ་རྒན་ཆེན་མོ། ཀྲུང་གོ་མི་རིགས་རིག་པའི་ལྷན་ཚོགས་ཀྱི་ལས་འཛིན་པ་སོགས་ཀྱིས་མཚོན་པའི་འགན་འགའ་ཡང་གཅིག་ལྕོགས་སུ་ཁུར་ཡོད།
ཁོང་སྤྱི་ལོ1998ལོ་ནས་བཟུང་སྟེ་སྔ་རྗེས་སུ་ཀྲུང་གོ་མི་དམངས་སློབ་ཆེན་དང་། ཨོ་སི་ཁྲི་རེ་ཡའི་ཞི་ཉེ་སློབ་ཆེན་དང་ཨ་ཏཱིག་སློབ་ཆེན། ཟེའར་ལན་ཏི་གསར་བའི་དཔལ་ཁཱ་སློབ་ཆེན། ཡོ་རོབ་གླིང་གི་རྒྱལ་ཁབ་གང་མང་དུ་ཕེབས་ཏེ་སློབ་སྦྱོང་དང་ཉམས་ཞིབ་མཛད།
2
བྱ་བའི་བརྒྱུད་རིམ།
ཁོང་སྤྱི་ལོ1979ལོར་མཚོ་ལྷོ་ཁུལ་མི་རིགས་དགེ་ཐོན་སློབ་གྲྭ་ནས་མཐར་ཕྱིན་མ་ཐག་དེ་གར་དགེ་རྒན་གྱི་ལས་ཀ་གཉེར། སྤྱི་ལོ1988ལོར་ནུབ་བྱང་མི་རིགས་སློབ་གྲྭ་ཆེན་མོ་རུ་གནའ་རབས་བོད་ཀྱི་ཞིབ་འཇུག་འཛིན་གྲྭ་ནས་མཐར་ཕྱིན་རྗེས། ཀན་ལྷོ་ཁུལ་རྩོམ་སྒྱུར་ཁང་དུ་བོད་རྒྱའི་ལོ་ཙཱ་དང་གནའ་དཔེ་བསྡུ་སྒྲིག་གི་ལས་སུ་ཞུགས། སྤྱི་ལོ1993ལོར་ལྷོ་ནུབ་མི་རིགས་སློབ་ཆེན་དུ་ཕེབས་ཤིང་། ད་ལྟ་དེ་གར་བྱ་བ་གཉེར་བཞིན་ཡོད།
3
བྱ་བའི་གྲུབ་འབྲས།
ཁོང་གིས《ནཱ་རོ་ཆོས་དྲུག》དང《བོད་དར་ཚད་མ་རིག་པའི་རྒྱ་འགྱུར་དེབ་ཕྲེང》ཞེས་པའི་རྒྱལ་ཁབ་སྤྱི་ཚོགས་ཚན་རིག་ཁང་གི་ལས་གཞི་གཉིས་ལེགས་པར་གྲུབ་ཅིང་། 《ཚད་མ་རིག་པ་དང་ནུབ་ཕྱོགས་གཏན་ཚོགས་ཀྱི་ཞིབ་བསྡུར》《བོད་སྐད་ཡིག་རྩོམ་ཡིག་ཆེད་ལས་ཀྱི་ལེགས་བཅོས་ཉམས་ཞིབ》《བོད་ཀྱི་ལོ་རྒྱུས་བསྡུས་པ་བསྐྱར་སྒྲིག》བཅས་ཞིང་ཆེན་རིམ་པའི་ལས་གཞི་དྲུག་གི་འགོ་བཟུང་ཡོད། གྲུབ་འབྲས་ལ་རྒྱལ་ཁབ་རིམ་པའི་དཔེ་བཟང་དཔྱད་འདེམ་གྱི་གྲས་སུ་ཚུད་པ་དང་། སི་ཁྲོན་ཞིང་ཆེན་གྱི་སྤྱི་ཚོགས་ཚན་རིག་གི་གྲུབ་འབྲས་ཨང་གསུམ་པ་དང་ཕུལ་བྱུང་བྱ་དགའ་སོགས་རྟགས་མ་མང་དུ་རེག
ཁོང་གིས་སློབ་ཁྲིད་དང་ཉམས་ཞིབ་སྟག་སེང་ཁ་སྤྲོད་ཀྱིས། ལྷོ་ནུབ་མི་རིགས་སློབ་ཆེན་གྱི་བོད་རིག་པའི་སློབ་གླིང་གི་བོད་སྐད་ཡིག་རྩོམ་རིག་དང་། ཚད་མ་རིག་པའི་ཆེད་སྦྱོང་གཙོ་བྱས་པའི་མི་རིགས་ཉམས་ཞིབ་སློབ་གླིང་གི་ཆོས་ལུགས་རིག་པའི་ཆེད་སྦྱོང་། ཆབ་སྲིད་དང་སྤྱི་ཚོགས་ཚན་རིག་སློབ་གླིང་གི་ཀྲུང་གོའི་མཚན་ཉིད་རིག་པའི་ཆེད་སྦྱོང་གི་དངོས་གཞི་སློབ་མ་དང་། རབ་འབྱམས་འོག་མ་དང་རབ་འབྱམས་གོང་མའི་ཞིབ་འཇུག་སློབ་མར། བོད་རྒྱའི་སྐད་རིགས་འཁོས་བསྟུན་གྱིས། བསྡུས་གྲྭ་དང་། ཚད་མའི་ཉམས་ཞིབ། ཕར་ཕྱིན་ཉམས་ཞིབ། དབུ་མའི་ཉམས་ཞིབ། བོད་བརྒྱུད་ནང་བསྟན་རིག་གནས་ཀྱི་ཉམས་ཞིབ། བཀའ་པོད་ལྔའི་སྤྱི་བཤད། ཚད་མའི་འཇུག་སྒོ་སོགས་གང་ལ་གང་མཐུན་གྱི་སློབ་ཁྲིད་ཆག་མེད་དུ་གནང་བ་ལས། ཚད་མའི་ཉམས་ཞིབ་ཅེས་པའི་བསླབ་ཚན་སི་ཁྲོན་ཞིང་ཆེན་གྱི་རྨད་བྱུང་བསླབ་ཚན་དུ་བདམས།
4
བརྩམས་ཆོས།
ཁོང་གིས་བོད་ལྗོངས་ཞིབ་འཇུག་དང་མི་རིགས་གནའ་དཔེ་གཉིས་ཀྱིས་མཚོན་པའི་དུས་དེབ་ཁག་ཏུ། 《བོད་ཀྱི་བསྟན་བཅོས་ལས་མིང་གདགས་སྟངས་ལ་དཔྱད་པ》དང《བོད་ཀྱི་ལོ་རྒྱུས་ལོ་ཙཱ་དང་རིག་གནས་སྣང་ཚུལ་གླེང་བ》《ཚད་མའི་བསྟན་བཅོས་ཀྱི་ལོ་ཙཱ་དང་ཉམས་ཞིབ་ལ་དཔྱད་པ》སོགས་བོད་རྒྱ་ཡིག་རིགས་ཟུང་གི་དཔྱད་རྩོམ30ལྷག་སྤེལ། 《རྟགས་རིགས་ཀྱི་གོ་དོན་གཟུར་གནས་དགྱེས་པའི་མཆོད་སྤྲིན》དང《ནཱ་རོ་ཆོས་དྲུག》《ཉི་ཟླ་ཁ་སྦྱོར》《ཀློང་ཆེན་མཛོད་བདུན་ལས་ཐེག་མཆོག་མཛོད་སྟོད་སྨད་གཉིས》《མན་ངག་མཛོད》《ཚིག་དོན་མཛོད》《ཆོས་དབྱིངས་མཛོད》བཅས་དང་། 《ཤཱཀྱ་ཤཱྀའི་རྣམ་ཐར》《བོད་རྒྱུད་ནང་བསྟན་བསྟན་བཅོས་ཉིང་བསྡུས་རྒྱ་འགྱུར་མ》《དཔལ་དོན་གྲུབ་རྒྱལ་གྱི་གསུང་འབུམ》《ལེགས་སྦྱར་སྐད་ལ་འཇུག་པའི་སྒོ》《བསྡུས་གྲྭའི་རིགས་ལམ་གྱི་ཟབ་གནད་ལེགས་བཤད་ཀུན་འདུས》བཅས་བརྩམས་འགྱུར་བསྒྲིགས་གསུམ་དཀྱུས་གཅིག་ཏུ་པོད18བཞུགས་ཤིང་། དེ་དག་ལས་ན་རོ་ཆོས་དྲུག་དང་ཀློང་ཆེན་མཛོད་ཀྱི་རྒྱ་འགྱུར་ལ་མིག་རྒྱ་སྲིང་ལ་ཡིད་རྒྱ་བསྐྱེད་པའི་གཟུར་གནས་ཚོགས་ཀྱིས་དང་བ་ལྷག་ཏུ་འཕེལ།
དཔྱད་གཞིའི་ཡིག་ཆ།