སློབ་དཔོན་དྷོ་ཁན་དྷི་པའི(གཉིས་གཅིག་ཏུ་བྱེད་པ)ལོ་རྒྱུས་ནི། ཡུལ་བྷ་སིན་ཏ་ཞེས་པ་ཡིན་ལ། རིགས་ཕྱགས་དར་ཁྲོད་པ། དེ་ཡང་དུས་རྟག་ཏུ་ཡུལ་བྷ་སིན་ཏ་ན་སྤྲང་པོ་ཕྱགས་དར་ཁྲོད་སྡུད་པའི་རིགས། གོས་རྙིང་པ་བསྐྱུར་བ་རྣམས་བསྡུས་ཀྱིན་བཙེམས་ནས་གོན་ཞིང་འདུག་པ་ལ། དུས་གཅིག་གི་ཚེ་དེའི་གན་དུ་ལེགས་པར་སྦྱངས་པའི་རྣལ་འབྱོར་པ་ཞིག་འོངས་ནས་ཁྱོད་དོན་མེད་པའི་སྡུག་བསྔལ་འདི་འདྲ་བས་ཅི་བྱེད། ཆོས་བྱས་པས་མི་ཆོག་གམ་ཞེས་གསུངས། ཕྱགས་དར་ཁྲོད་པ་ན་རེ། བདག་ལ་ཆོས་སུས་སྟེར་ཟེར། རྣལ་འབྱོར་པས་ངས་ཆོས་སྦྱིན་གསུངས་ནས་བདེ་མཆོག་གི་དཀྱིལ་འཁོར་དུ་དབང་བསྐུར་ནས་བསྐྱེད་རྫོགས་ཟུང་འཇུག་གི་གདམས་ངག་གནང་ནས་གོས་རྙིང་པའི་དུམ་བུ་ཀུན་བཙེམས་ནས་གོན་པ་དང་། དམིགས་པ་གཉིས་གཅིག་ཏུ་བྱེད་པ་ལ་དམིགས་པས་གཉིས་འཛིན་གྱི་རྣམ་རྟོག་དོར་ནས་གཉིས་སུ་མེད་པར་སོང་སྟེ། བསྐྱེད་རྫོགས་ཟུང་འཇུག་གི་རྟོགས་པ་ལོ་བཅུ་གཉིས་བསྒོམས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ། ལོ་ངོ་བརྒྱའི་བར་དུ་འགྲོ་དོན་དཔག་ཏུ་མེད་པ་མཛད་ནས་མཁའ་སྤྱོད་དུ་གཤེགས་སོ། ། སློབ་དཔོན་དྷོ་ཁན་དྷི་པའི་རྟོགས་བརྗོད་ནི། ཀུན་རྫོབ་བསྐྱེད་པའི་རིམ་པ་དང་། ། དོན་དམ་རྫོགས་པའི་རིམ་པ་གཉིས། ། ཟུང་འཇུག་ཕྱག་རྒྱ་ཆེན་པོར་བསྒོམ། ། འབྲས་བུ་སྐུ་ལྔ་ཡེ་ཤེས་ལྔ། ། ཞེས་གསུངས་སོ། ། སློབ་དཔོན་དྷོ་ཁན་དྷི་པའི་རྣམ་ཐར་དང་ལོ་རྒྱུས་རྫོགས་སོ། །