སློབ་དཔོན་ཤ་བ་རི་པའི(རི་དྭགས་རྔོན་པའམ་རི་ཁྲོད་པ)ལོ་རྒྱུས་ནི། རི་ཅི་དྷ་ཏྲ་བི་ཏྲ་མ་ལ་ཞེས་བྱ་བའི་རི་ལ་ཤ་བ་རི་ཞེས་བྱ་བའི་རྔོན་པ་ཞིག་ཡོད་པ་དེ། དུས་རྒྱུན་དུ་འཚོ་བའི་ཕྱིར་སྲོག་ཆགས་མང་པོ་བསད་ཅིང་། གནོད་པའི་ལས་འབའ་ཞིག་ལ་དུས་འདའ་ཞིང་། སྡིག་པའི་རང་བཞིན་དུ་གནས་པ་ལ་འཕགས་པ་སྤྱན་རས་གཟིགས་ཀྱིས་དགོངས་ཤིང་། དེ་ལ་ཐུགས་རྗེས་གཟིགས་ནས་སྙིང་རྗེ་ཆེར་སྐྱེས་ཏེ་དེ་འདུལ་བའི་དུས་ལ་བབས་པ་མཁྱེན་ནས། ཤ་བ་རི་འདྲ་བའི་རྔོན་པ་ཞིག་ཏུ་སྤྲུལ་ཏེ་དེའི་གནས་སུ་ཕྱིན་པ་དང་། ཤ་བ་རི་པས་ཁྱོད་སུ་ཡིན་དྲིས་པས་ང་ཤ་བ་རི་པ་བྱ་བ་ཡིན་བྱས་པས། ཁྱོད་ཀྱི་ཡུལ་གང་ཡིན་ཟེར། ཐག་རིང་པོ་ཞིག་ན་ཡོད་བྱས་པས། འོ་ན་ཁྱོད་ཀྱི་མདའ་གཅིག་གིས་ཤ་བ་དུ་སོད་ཟེར། འཕགས་པས་སུམ་བརྒྱ་ཙམ་དུས་གཅིག་ལ་སོད་སྨྲས་པས། རྔོན་པ་ན་རེ། འོ་ན་མདའ་དེ་འདྲ་ང་ལ་ཡང་སློབ་ཟེར། སང་བསླབ་ཀྱི་བྱས་ཏེ་ནང་པར་རྔོན་པ་ཤ་བ་རི་ཐང་ཆེན་གཅིག་ཏུ་ཁྲིད་ནས་སྤྲུལ་པའི་ཤ་བ་ལྔ་བརྒྱ་ཙམ་བསྟན་ནས། ངའི་མདའ་གཅིག་གིས་འདི་ཐམས་ཅད་དུས་གཅིག་ལ་གསོད་སྨྲས་པས། རྔོན་པ་ཤ་བ་རི་ན་རེ། བཞི་བརྒྱ་ཕར་བོར་བརྒྱ་གསོད་པ་གྱིས་དང་ཟེར། དེ་ནས་འཕགས་པས་སྤྲུལ་པའི་ཤ་བ་ལྔ་བརྒྱ་མདའ་གཅིག་གིས་དུས་གཅིག་ལ་བསད་ནས་ཤ་རོ་གཅིག་རྔོན་པ་ལ་བསྐུར་བས་མ་ཐེག་པར་ཤ་བ་རིའི་ང་རྒྱལ་ཆག་ནས་ཁྱིམ་དུ་སླེབས་པ་དང་། འཕགས་པ་ལ་དེ་འདྲ་བའི་འཕོངས་ཀྱི་སྟོབས་གདའ་བ་བདག་ལ་སློབ་ཟེར། འཕགས་པས་སྨྲས་པ། དེ་སློབ་པ་ལ་ཟླ་བ་གཅིག་གི་བར་དུ་ཤ་མ་ཟ་ཞིག་བྱས་པ་དང་། ཤ་བ་རིས་ཁས་བླངས་ནས་སྲོག་ཆགས་ལ་གནོད་པ་སྤངས་པ་དང་། ཡང་འཕགས་པས་ཞག་བདུན་ནས་དེའི་གན་དུ་བྱོན་ཏེ། ཁྱོད་ཀྱིས་ཅི་ཟོས་གསུངས་པས། བདག་གིས་ཤིང་ཏོག་ཟོས་ཟེར། དེ་ནས་འཕགས་པས་ཁྱེད་ཅག་གིས་སེམས་ཅན་ལ་བྱམས་པ་དང་སྙིང་རྗེ་སྒོམས་ཤིག་གསུངས། དེ་ནས་ཟླ་བ་གཅིག་སོང་བ་དང་གནས་དེར་བྱོན་པ་དང་། རྔོན་པ་ཤ་བ་རི་ན་རེ། ད་འཕོངས་སློབ་རི་དྭགས་གཤོར་བའི་ཆོས་ཤོད་ཟེར་བ་དང་། འཕགས་པས་མཎྜལ་ཞིག་མཛད་ནས་མེ་ཏོག་བཀྲམ་སྟེ་ཤ་བ་རི་བཟའ་མི་རྣམས་ལ་མཎྜལ་ལ་ལྟོས་ཤིག་གསུངས། དེ་རྣམས་ཀྱིས་བལྟས་པས་མཎྜལ་གྱི་ནང་དུ་དམྱལ་བ་ཆེན་པོ་བརྒྱད་དང་ཁོ་རང་གཉིས་ཀྱང་དེ་ན་འཚེད་པར་མཐོང་བས་འཇིགས་ཤིང་སྐྲག་ནས་འདར་བ་དང་། དངངས་ནས་སྐད་གཅིག་ཀྱང་མ་ཐོན་པ་ལ། འཕགས་པས་ཅི་མཐོང་ཡང་ཡང་དུ་དྲིས་པས། སེམས་ཅན་དམྱལ་བ་འདི་འདྲ་བ་གདའ་ཟེར། འོ་ན་ཁྱོད་དེར་སྐྱེ་བ་ལ་མི་འཇིགས་སམ་གསུངས་པས། འཇིགས་ལགས་ཏེ་དེ་ལས་ཐར་པའི་ཐབས་མཆིས་སམ་ཞུས་པ་དང་། ཐབས་ཡོད་དེ་བསྒྲུབ་ནུས་སམ་གསུངས་པས། ནུས་ཟེར། 7འཕགས་པས་རྔོན་པ་ཤ་བ་རི་བཟའ་མི་གཉིས་ལ་ཆོས་བཤད་དེ་སྲོག་བཅད་པའི་རྣམ་པར་སྨིན་པས་ནི་སེམས་ཅན་དམྱལ་བར་སྐྱེ་བ་ཡིན་ལ། བྱེད་པ་རྒྱུ་མཐུན་ནི། ཚེ་འདིར་སྲོག་གཅོད་སྙིང་འདོད་པ། དེའི་དབང་གིས་འབྲས་བུ་ཚེ་ཐུང་། སྐྱེས་བུ་བྱེད་པའི་འབྲས་བུ་གཟི་བརྗིད་ཆུང་བ་ཡིན་ནོ། །སྲོག་གཅོད་ཀྱི་ལས་སྤངས་པས་བྱང་ཆུབ་ཐོབ་ལ། བྱེད་པ་རྒྱུ་མཐུན་ནི་སྲོག་གཅོད་སྙིང་མི་འདོད་པ། དེའི་དབང་གིས་འབྲས་བུ་ཚེ་རིང་། སྐྱེས་བུ་བྱེད་པའི་འབྲས་བུ་གཟི་བརྗིད་ཆེ་ཞིང་མདངས་དང་ལྡན་པ་ཡིན་ནོ་ཞེས་མི་དགེ་བ་བཅུའི་ཉེས་དམིགས་དང་། དགེ་བ་བཅུའི་ཕན་ཡོན་བཤད་པས། ཤ་བ་རི་འཁོར་བ་ལ་སྐྱོ་བ་སྐྱེས་ནས་ཆོས་ལ་མི་ཕྱེད་པའི་དད་པ་བརྟན་པོ་ཐོབ་པར་གྱུར་ཏེ། དེ་ནས་འཕགས་པས་བྱང་ཆུབ་སེམས་ཀྱི་གདམས་པ་གནང་ནས་རི་བོ་ད་དིར་གཤེགས་སོ། །དེ་ནས་ཤ་བ་རིས་ལོ་བཅུ་གཉིས་སྙིང་རྗེ་བསྒོམས་པས་མཆོག་གི་དངོས་གྲུབ་ཐོབ་ནས་སྙིང་རྗེ་ཆེན་པོའི་ཆོས་ཉིད་ལས་ལངས་ཏེ་འཕགས་པའི་དྲུང་དུ་བྱོན་པས། འཕགས་པས་ཤ་བ་རི་ལ་ཡོན་ཏན་གྱི་བསྔགས་པ་དུ་མ་བརྗོད་ནས་འདི་སྐད་དུ། རིགས་ཀྱི་བུ་རྩྭའི་མེ་ཤི་བ་དང་འདྲ་བའི་ཕྱོགས་གཅིག་གི་མྱང་འདས་ནི་མཆོག་མ་ཡིན་པས་སེམས་ཅན་གྱི་དོན་དུ་འཁོར་བར་འདུག་ལ། གཞན་དོན་གྱིས་ཤིག་ཅེས་གསུངས་པས་རང་ཡུལ་དུ་ལོག་སྟེ་མཚན་དཔལ་ཤ་བ་རི་ཞེས་གྲགས། རྨ་བྱའི་སྒྲོས་འདོམས་དཀྲིས་བྱས་པས་ནམ་མཁའི་གོས་ཅན་དུ་གྲགས། རི་ལ་རྟག་ཏུ་བཞུགས་པས་རི་ཁྲོད་མགོན་པོ་ཞེས་ཏེ་མཚན་གསུམ་དུ་གྲག་གོ །ཤ་བ་རི་པའི་རྟོགས་པ་བརྗོད་པ་ནི། མ་རིག་པ་ཡི་ནགས་ཚལ་དུ། ། གཟུང་འཛིན་རི་དྭགས་རྒྱུ་བ་ལ། །ཐབས་དང་ཤེས་རབ་གཞུ་བརྡུངས་ནས། །སྙིང་པོའི་དོན་གྱི་མདའ་ཞིག་འཕངས། །ཤི་ནི་རྣམ་པར་རྟོག་པ་ཤི །ཤ་ནི་གཉིས་སུ་མེད་པར་ཟོས། །རོ་ནི་བདེ་བ་ཆེན་པོ་མྱོང་། །འབྲས་བུ་ཕྱག་རྒྱ་ཆེན་པོ་ཐོབ། །ཅེས་གསུངས་སོ། །སློབ་དཔོན་ཤ་བ་རི་པའི་རྣམ་ཐར་དང་ལོ་རྒྱུས་རྫོགས་སོ། །