སློབ་དཔོན་ཌོམྦི་བའི(གཡུང་པོ)ལོ་རྒྱུས་ནི། ཡུལ་མ་ག་ངྷཱ་པ་རིགས་རྒྱལ་རིགས་ཡིན་ལ། དངོས་གྲུབ་དགྱེས་རྡོར་ལས་ཐོབ་པའོ། །དེ་ཡང་བླ་མ་ནག་པོ་སྤྱོད་པ་བས་དབང་བསྐུར་བྱས་ནས་གདམས་ངག་ཕོག་སྟེ། དོན་ཉམས་སུ་བླངས་པ་དང་། འབངས་རྣམས་ལ་བུ་གཅིག་པའི་བསམ་པ་བཞིན་དུ་བརྩེ་བས། མི་རྣམས་ཀྱིས་ཆོས་སྒོར་ཞུགས་པ་ནི་མ་ཚོར། རང་བཞིན་གྱིས་འཇམ་ཞིང་བྱམས་པས་སྐྱོང་བར་འདུག་པས་ཕྱོགས་ཐམས་ཅད་མཐུན་པར། རྒྱལ་པོ་འདི་ནི་ཆོས་པ་འདྲ་བ་གཅིག་འདུག་ཟེར། དེའི་དུས་སུ་རྒྱལ་པོས་བློན་པོ་རྣམས་ལ་སྨྲས་པ། འོ་སྐོལ་མ་ག་ངྷཱའི་གྲོང་ཁྱེར་འདི་ན་ཆོམ་རྐུན་གྱི་འཇིགས་པས་མི་ཀུན་ལ་འཕྲོག་འཇོམས་བྱེད་པ་དང་། རང་གི་བསོད་ནམས་དམན་པའི་སྔོན་ལས་ཀྱི་དབང་གིས་དབུལ་བ་དང་ཕོངས་པ་ཤིན་ཏུ་མང་བས་འདི་ཀུན་ཕོངས་པ་དང་འཇིགས་པ་ལས་བསྐྱབ་པའི་ཕྱིར། མཁར་གྱི་གཅོང་ཆེན་པོ་འདི་གནོད་པ་བྱེད་པ་དང་ཕོངས་པ་མཐོང་དུས་རྡུངས་ཤིག དེ་མ་ཡིན་པར་མ་རྡུངས་ཤིག་ཅེས་སྨྲས་པས་བློན་པོས་ཀྱང་དེ་བཞིན་དུ་བྱས་ཏེ་ཕྱོགས་ཀུན་ཏུ་དྲིལ་བསྒྲགས་པས། མ་ག་ངྷཱར་འཇིགས་པ་དང་ཕོངས་པ་ཐམས་ཅད་ཀྱི་རྒྱུན་ཆད་ནས་ཐམས་ཅད་བདེ་ཞིང་སྐྱིད་པར་གནས་སོ། །དེ་ནས་དུས་རེ་ཞིག་ན་རྒྱལ་པོའི་སར་རིགས་ངན་གྱི་གླུ་མཁན་ཚན་པ་ཞིག་འོངས་ནས་རྒྱལ་པོ་ལ་གླུའི་རོལ་མོ་འབུལ་བར་བྱུང་བའི་ཕྱི་ལ་རིགས་ངན་དེའི་བུ་མོ་ལོ་བཅུ་གཉིས་ལོན་པ། གྲོང་པའི་ཆོས་ཀྱིས་མ་གོས་པ་བཞིན་ལྟ་ན་སྡུག་ཅིང་ཁ་དོག་མཛེས་པ། ཡིད་དུ་འོང་བ། པདྨའི་རིགས་ཀྱི་ཡོན་ཏན་ཐམས་ཅད་ཚང་བ་གཅིག་ཁྲིད་བྱུང་བས། རྒྱལ་པོས་ཁྱོད་ཀྱི་བུ་མོ་འདི་ང་ལ་བྱིན་ཅིག་ཅེས་སྨྲས་པས། གླུ་མཁན་དེ་ན་རེ། རྗེ་ཉིད་མ་ག་ངྷཱའི་རྒྱལ་པོ་གྲོང་ཁྱེར་འབུམ་ཚོ་བཅོ་བརྒྱད་ལ་དབང་བྱེད་པ། རྒྱལ་སྲིད་ཀྱི་དཔལ་འབྱོར་ཆེན་པོ་ལ་ལོངས་སྤྱོད་པ་ལགས་ན། བདག་ནི་རིགས་ངན་པས་སྐྱེ་བོའི་ཚོགས་ཀྱིས་སྨད་ཅིང་སྤང་པའི་གནས་སུ་གྱུར་པས། ལྷའི་རྗེ་བཀའ་བསྩལ་གྱི་འོས་མ་ལགས་སོ་ཞེས་ཞུས་པ་དང་། རྒྱལ་པོས་ནན་གྱིས་བཀའ་བསྩལ་ཞིང་ཐབས་ཀྱིས་གཅུན་ནས། འདི་སྐད་དུ། ཇི་སྲིད་མ་རྟོགས་བར་དུ་རང་གཞན་རྟོག་པས་བཅིངས། །དེ་ཚེ་རྟོགས་པར་གྱུར་ནས་རང་གཞན་གཉིས་མ་གྲུབ། །དེས་ན་སངས་རྒྱས་ཞེས་བྱ་བདག་གི་བླ་དགས་ཡིན། །དེ་ཉིད་སྤྲོས་བྲལ་ངང་ལས་རང་སེམས་གཉུག་མ་ཟུང་། །ཞེས་གསུངས་ཏེ། བུ་མོ་དང་ལྗིད་མཉམ་པའི་གསེར་ཕ་ལ་བྱིན་ནས། བུ་མོ་རྒྱལ་པོ་ལ་ཕུལ་ལོ། །དེ་ནས་ལོ་བཅུ་གཉིས་ཀྱི་བར་བསྟེན་པས་སུས་ཀྱང་མ་ཚོར་བ་ལ། དེ་ནས་ལོ་བཅུ་གཉིས་ནས་ཀུན་གྱིས་རིག་སྟེ་རིགས་ངན་མ་བཙུན་མོར་བླངས་སོ་ཞེས་མ་ག་ངྷཱའི་ཕྱོགས་མཚམས་ཐམས་ཅད་དུ་གྲགས་པ་ངན་པས་ཁྱབ་པ་དང་། རྒྱལ་པོས་སྲས་ལ་རྒྱལ་སྲིད་གཏད་ནས་རིགས་ངན་མ་ཁྲིད་དེ་ནགས་སུ་བསྒྲུབ་པ་ལ་བྱོན། ལོ་བཅུ་གཉིས་བཞུགས་པས་གྲུབ་པ་བརྙེས་སོ། །
དེའི་བར་ལ་མ་ག་ངྷཱ་ལ་སོགས་པའི་ཡུལ་ཁམས་ཐམས་ཅད་གུད་ཅིང་། སྲས་འབངས་རྣམས་ཀྱིས་རྒྱལ་སྲིད་མི་ཟིན་པ་ལ་ཐུག སྡུག་བསྔལ་ཆེན་པོས་ནོན་ནས་མི་ཀུན་གྲོས་བྱས་ཏེ་སྔར་གྱི་རྒྱལ་པོ་དེ་ཉིད་བཙལ་ན་རྒྱལ་སྲིད་སྐྱོང་བར་ཞུས་ན་ལེགས་སོ་ཟེར་ནས་མི་འགའ་བཏང་སྟེ་གནས་གསེབ་ཏུ་བཙལ་བས། རྒྱལ་པོ་ཤིང་སྡོང་གཅིག་གི་སྟེང་ན་བཞུགས། རིགས་ངན་གྱི་བུ་མོ་དེ་ཆུ་ལེན་དུ་སོང་བ་མཚོའི་ཁ་ལ་པདྨའི་ལོ་མའི་སྟེང་ན་ཕར་ཆུ་ལ་མི་ནུབ་བར་སོང་ནས། ཆུ་འདོམ་བཅོ་ལྔ་ཙམ་གྱི་འོག་ནས་བླངས་ཏེ། རྒྱལ་པོ་ལ་དྲངས་པ་མཐོང་ནས་མི་དེ་ཀུན་ངོ་མཚར་སྐྱེས་ཏེ་ཡུལ་ལ་ལོག་ནས། དེའི་གཏམ་སྨྲས་པས་རྒྱལ་འབངས་ཀུན་གྱིས་དེ་ཐོས་པ་ཡ་མཚན་སྐྱེས་ཏེ་སླར་སྤྱན་འདྲེན་བཏང་བས། ནགས་གསེབ་ནས་ཡབ་ཡུམ་གཉིས་ཀ་སྟག་ལ་བཞོན། དུག་སྦྲུལ་ལྕག་བྱས་ཏེ་བྱོན་པ་དང་། ཀུན་ངོ་མཚར་དཔག་ཏུ་མེད་པ་སྐྱེས་ནས་རྒྱལ་སྲིད་འཛིན་པར་གསོལ་བ་བཏབ་པས། རྒྱལ་པོ་ན་རེ། ང་རིགས་ངན་ཡིན་པས་རྒྱལ་པོ་བྱེད་དུ་ག་ལ་རུང་། འོན་ཀྱང་ཤི་ཕན་ཆད་རིགས་བཟང་ངན་གྱི་རྟོག་པ་བྲལ་བ་ཡིན་པས། ང་མེར་སྲེགས་ཤིག དེ་ནས་སྐྱེས་པ་དང་གཟོད་བྱ་ཟེར་ནས་ཡུལ་མི་ཀུན་གྱིས་ཙནྡན་གོར་ཤི་ཤའི་ཤིང་གིས་ཡབ་ཡུམ་གཉིས་བསྲེགས་པས། ཞག་བདུན་དུ་མེ་མ་ཤི། དེ་ནས་བལྟས་ཙམ་ན་ཐལ་བའི་དབུས་མཚོ་ཆུང་ངུ་ཞིག་གི་དཀྱིལ་མེ་ཏོག་པདྨའི་སྡོང་པོའི་གོང་བུ་ཁ་བྱེ་བའི་ནང་ན། ཡབ་ཡུམ་གཉིས་རང་བྱུང་གི་དགྱེས་པ་རྡོ་རྗེ་ཡབ་ཡུམ་དུ་གྱུར་ནས་སྐུ་ལས་འོད་ཟེར་དུ་མ་འཕྲོ་བཞིན་བཞུགས་པ་མ་ག་ངྷཱ་པ་རྣམས་ཀྱིས་མཐོང་ནས། ཐམས་ཅད་དད་པར་གྱུར་ཏེ་མཚན་སློབ་དཔོན་ཌོམྦི་བ་ཞེས་བྱ་བར་གྲགས་སོ། །དེ་ནས་རྒྱལ་པོས་སྲས་བློན་པོ་ལ་སོགས་པ་ཐམས་ཅད་ལ་སྨྲས་པ། ཁྱེད་རྣམས་ང་ཙུག་ནུས་ན་ང་རྒྱལ་སྲིད་བྱེད། དེ་ཙུག་མི་ནུས་པ་མི་བྱེད་ཅེས་སྨྲས་པས་ཐམས་ཅད་ཧ་ལས་ཏེ་འདི་འདྲ་བ་གར་ནུས་ཟེར་ནས་འདུག་གོ །དེ་ནས་རྒྱལ་པོས་སྨྲས་པ། རྒྱལ་སྲིད་ནི་མནོག་ཆུང་ལ་ཉེས་དམིགས་ཆེ་བར་འདུག་པས་ང་ནི་ཆོས་ཀྱི་རྒྱལ་སྲིད་བྱེད་པ་ཡིན་གསུངས་ནས་མི་ཡུལ་དུ་ལོ་བདུན་བརྒྱའི་བར་དུ་འགྲོ་དོན་མཛད་དོ། །ཌོམྦི་བས་རྟོགས་བརྗོད་ནི། གསེར་འགྱུར་རྩི་ཡི་ནུས་པ་ཡིས། །ལྕགས་རྣམས་གསེར་དུ་བསྒྱུར་བ་ལྟར། །རིན་ཆེན་དབང་གི་ནུས་པ་ཡིས། །ཉོན་མོངས་གཉིས་མེད་ཡེ་ཤེས་འགྱུར། །ཅེས་གསུངས་སོ། །སློབ་དཔོན་ཌོམྦི་བའི་ལོ་རྒྱུས་སོ། །