ཐང་གའི་རས་གཞི་བཟོ་བའི་ལག་ཤེས།
ཐང་གའི་རས་གཞི་བཟོ་བ་ལ། རས་གཞིར་འོས་པའི་རས་ནི་ཆབ་མདོའི་ལྷ་བཟོ་དབུ་ཆེན་ཚེ་དབང་བསམ་གྲུབ་སོགས་ཀྱིས། འཇང་རས་དང་། མོན་རས། དབུས་ཀྱི་རས། ཀ་ཤི་ཀ་བཅས་རས་ཀྱི་རིགས་བཞིར་གསུངས་ཀྱང་། དེ་ནི་སྔོན་ཚེ་རས་ཀྱིས་རིགས་འགའ་ཡང་མེད་ལ། ཡོད་པ་དེ་དག་ལས་ཀྱང་ལག་བཏགས་ཀྱི་རས་རྩུབ་འབོར་ཆེ་བས་གཞིར་མི་འོས་པས་གོང་གི་རས་ཀྱི་རྣམ་གྲངས་བཞི་བོ་ཁོ་ན་ཙམ་གསུངས་པར་སྣང་ལ། དེང་དུས་སུ་རས་ཀྱི་རིགས་མང་ཞིང་གོང་གི་རས་རིགས་བཞི་ལས་ཀ་ཤི་ཀ་ཙམ་མ་གཏོགས་མཐོང་རྒྱུ་མེད་པས་ངེས་པ་ཅན་དུ་མ་མཆིས་སོ་སྙམ་མོ། །
བཅད་ཀྱི་ལག་ཤེས།
བཅད་རྒྱག་པ་ནི་བོད་དང་རྒྱ་ནག་གི་རི་མོའི་ཁྱད་ཆོས་ཏེ་རི་མོའི་བཞག་སོ་ཡང་ཡིན་མོད། སྐྱ་རིས་དང་ཚོན། མདངས་ཐམས་ཅད་ཇི་ལྟར་ལེགས་ཀྱང་བཅད་རིས་ངན་ན་བརྫད་ངེས་པས་བཅད་ལེགས་པ་གལ་ཆེ། སྤྱིར་བཟོ་རྒྱུ་བཟང་ངན་བཟོ་བོ་ཐམས་ཅད་ལ་འབྱུང་ཡང་། བྱང་ཆ་ཆེ་ཆུང་ནི་བརྩོན་འགྲུས་ལ་རག་ལས་ཤིང་། བཅད་རིས་བཟང་ངན་དེ་པིར་རིས་ཀྱི་བྱང་ཚད་ཡིན་པས། རྟག་པར་པིར་གྱི་རི་མོ་སྦྱངས་པ་ནི་བཅད་རིས་བཟང་བོ་འབྱུང་བའི་ཐབས་ལམ་ཉག་གཅིག་གོ ། །
མདངས་ཀྱི་ལག་ཤེས།
སྤྱིར་མདངས་ལ་སྐམ་མདངས་དང་རློན་མདངས་གཉིས་སུ་དབྱེ་ཞིང་། སྐམ་མདངས་ལ་ནང་གསེས་བཙག་མདངས་དང་། འབར་མདངས། བཤལ་མདངས་གསུམ་དང་། རློན་མདངས་ལ་སྐྱ་མདངས་དང་། ཆུ་མདངས་དང་། རོབ་མདངས་གསུམ་ཏེ་དབྱེ་བ་དྲུག་ཙམ་མཆིས།
ཚོན་ཆེན་བཙོ་འདུལ་སྦྱོར་གསུམ་གྱི་ལག་ཤེས།
གསེར་བཙོ་སྤྲད་བྱེད་པ་ལ་འབྲུ་བཙོ་དང་ལྗང་བཙོ་གཉིས་ཡོད་དེ། གཉིས་ཀ་གང་བྱེད་ཀྱང་ཐོག་མར་རྫ་ས་སྤུས་ལེགས་ཀྱིས་བཙོ་སྒམ་སྲབ་མཐུག་དང་གས་ཆག་མེད་པ། བཙོ་བྱ་གསེར་གྱི་མང་ཉུང་དང་འཚམས་ཤིང་ཁེབས་གཅོད་རང་འགྲིགས་ཡོད་པ་ཞིག་བཟོས་ནས། སེ་ཐེབས་ཀྱིས་མེར་བསྲེགས། དེ་ནས་རྫ་མ་གསར་བ་མདོག་དམར་པོ་སྤྱོད་མ་མྱོང་བ་ཞིག་ཞིབ་ཏུ་བཏགས་པའི་ཕྱེ་མ་ལ་ཚྭ་དཀར་ལྷད་མེད་ལྔ་ཆའི་གཅིག་དང་མཚུར་ནག་ཚྭ་འདེབས་ཙམ་བསྲེས་ནས་ཞིབ་ཏུ་བཏུལ་བ་ལ་བཙོ་ཐལ་ཞེས་ཟེར་ཞིང་། གསེར་འབྲུ་བཙོ་དང་ལྗང་བཙོ་གཉིས་ཀར་མེད་དུ་མི་རུང་བ་སྟེ། དེ་བཙོ་སྒམ་དུ་གྲི་ལྟག་མཐུག་ཤོས་ཙམ་ཁོད་སྙོམས་པར་བཀྲམ་པའི་སྟེང་དུ། འབྲུ་བཙོ་བྱས་ན་གསེར་འབྲུ་ཐིག་པའམ། བྱེ་གསེར་དངུལ་ཆུ་དང་བྲལ་བ་དེ་དག་གཅིག་གིས་གཅིག་ལ་མ་རེག་པར་བཀོད་པའི་སྟེང་དུ་བཙོ་ཐལ་སྔ་མའི་སྲབ་མཐུག་ཙམ་བཀབ་ལ་ཡང་དུ་གསེར་གོང་ལྟར་བཀྲམ། དེའི་སྟེང་དུ་ཡང་གཅིག་སྟེ་རིམ་པ་གསུམ་ལས་མང་མི་ཉན། དེ་ལྟར་གསེར་ཕན་ཚུན་དང་ཕྱིའི་སྒམ་ལ་མ་རེག་པར་བཙོ་ཐལ་གྱིས་བར་གསེང་བཀང་ལ་ཁེབས་གཅོད་བཀབ། བར་མཚམས་ཚྭ་འདམ་དང་སོལ་ཕྱེ་བསྲེས་མས་ཞལ་བ་ལེགས་པར་བྱ། སྐམ་ནས་གས་བྱུང་ན་ཞལ་བ་ཡང་ཡང་བྱས་ཏེ་གསེང་མེད་པར་བྱ། དེ་ནས་རྫ་མ་ཞབ་རྡོལ་ཆེན་པོ་ཞིག་གི་ནང་དུ་རྫ་སའི་རྐང་གསུམ་བཙུགས་པའི་ཁར་བཙོ་སྒམ་བཞག རྫ་མའི་ནང་ཤིང་དང་སོལ་བས་བཀང་། ཕྱོགས་ཡོངས་ནས་རྫ་མའི་ནང་རླུང་རྒྱུ་བའི་བུ་ག་གཏོད། བོང་མེ་བསྲེག་ཀྱང་རུང་བ་ལ་རླུང་ཆེན་ལྡང་ན་ཚ་དྲགས་པའི་ཉེན་ཁ་ཡོད་པས། རླུང་ཆེན་མི་ལྡང་བ་བྱས་ཤིང་མེ་སྤར་ནས་ཉིན་ཞག་གཅིག་བསྲེགས་རྗེས་གྲང་བ་དང་ཁ་ཕྱེ་ལ་བཙོ་ཐལ་ཆུས་བཀྲུས་ནས་བླངས་ཏེ་བཞུ་བླུག་སོགས་གང་དགོས་སྤྱད་ན་འགྲིག་གོ ། །
ཚོན་སྡེབ་སྦྱོར་གྱི་ལག་ཤེས།
ཚོན་ལ་བཟོ་རྒྱུན་རི་མོའི་རིགས་ཀྱི་དགོས་མཁོ་དང་མཐུན་པའི་རྣམ་གྲངས་ཤིན་ཏུ་མང་སྟེ། དཔེར་ན། ཆུ་ཚོན་གྱི་རི་མོ་ལ་སྤྱོད་པའི་ཆུ་ཚོན་དང་། སྣུམ་རིས་སུ་སྤྱོད་པའི་སྣུམ་ལྡན་གྱི་ཚོན་དང་། དེ་བཞིན་ལཱ་ཚོན་དང་། རྡུལ་ཚོན་དང་། ཕྱེ་ལྡན་གྱི་ཚོན་དང་། བལ་ཚོན་དང་རས་ཚོས་སོགས་རྩ་ལྡུམ་དང་ལྗོན་ཤིང་ལས་བླངས་པའམ་ཡང་ན་ས་འོག་གི་གཏེར་ལས་བླངས་པའི་རྣམ་གྲངས་དུ་མ་དང་། གཞན་ཡང་རྒྱུ་རྩི་ཤིང་ལས་བྱུང་བའི་གཡེའུ་སོགས་ཤིང་ཚོན་གྱི་རིགས་དང་། དེང་དུས་སུ་ཕྱི་གླིང་ནས་ཐོན་པའི་པིན་ཤིས་ལ་སོགས་རྫས་འགྱུར་ལས་བྱུང་བའི་ཚོན་གྱི་རིགས་དང་། ཀྲུང་གོའི་སྲོལ་རྒྱུན་རི་མོར་ཆེད་དུ་སྤྱོད་པའི་ཀྲུང་གོའི་རི་མོའི་ཚོན་སོགས་མང་བོ་ཡོད་པ་ལས། སྤྱིར་བོད་རིས་སུ་སྤྱོད་པའི་ཚོན་ལ་ཚོན་ཆེན་ཞེས་བརྗོད་དེ། ས་འོག་གི་གཏེར་རྡོ་སྣ་ཚོགས་ལས་བླངས་པ་ཤ་སྟག་ཡིན་པས། རི་མོ་བྲིས་ནས་ལོ་ངོ་སྟོང་ཕྲག་དུ་མ་འདས་ཀྱང་མདོག་མི་ཡལ་ཞིང་། ཚོན་གཞན་དག་ལས་སྣུམ་བརྗིད་ཆེ་བའི་ཁྱད་ཆོས་ཡོད། གསེར་དང་། དངུལ་དང་། མཚལ་དང་། གཙང་སྤང་། གཙང་མཐིང་སོགས་རིན་ཐང་གསེར་དང་མཉམ་པའམ་ཡང་ན་གསེར་ལས་ལྷག་པའི་ཚོན་གྱི་རིགས་མང་དུ་སྤྱོད་པས། ཚོན་གྱི་ལག་ལེན་དང་སྡེབ་སྦྱོར་སོགས་ལའང་བཟོ་རྒྱུན་གཞན་དང་མི་འདྲ་མའི་ཤེས་བྱ་མང་པོ་ཡོད་པར་མ་ཟད། ལག་ལེན་མི་ཉུང་བ་ཞིག་བཟོའི་སློབ་དཔོན་གྱི་ལག་ལེན་དམར་ཁྲིད་ལ་མ་བརྟེན་ན་དཔེ་ལྟས་ཙམ་གྱིས་ཇི་བཞིན་པ་ཤེས་དཀའ་སྟེ། དཔེར་ན། བོད་རིས་སུ་ཁྱད་པར་སྤྱོད་ཅིང་། བོད་ཀྱི་མལ་གྲོ་གུང་དཀར་དང་སྙེ་མོ། ཡངས་པ་ཅན་ལས་ཡུལ་གཞན་ན་མེད་པའི་གཙང་སྤང་གཙང་མཐིང་ཞེས་རིན་ཐང་གསེར་ལས་ཆེ་ཞིང་ལག་ལེན་དཀའ་བའི་ཚོན་དེ་སྤྱོད་པར་འདོད་ན། ཐོག་མར་ཚོན་གྱི་འདུལ་སྦྱོར་དཔྱིས་ཕྱིན་པ་ཞིག་མ་ཤེས་ན་རང་མདོག་ཇི་བཞིན་མི་ཐོན་པ་ལྟ་བུ་སྟེ། འདིར་ཚོན་དང་ཚོན་གྱི་ལག་ལེན་སྤྱི་ཙམ་བཤད་པའོ། །
ཞལ་འདག་བཟོ་བའི་ལག་ཤེས།
ས་ལ་འབྱར་རྩི་མེད་ན་གོག་སླ། ཆུ་ཁྱོག་མེད་ན་རླན་ཕོག་པ་ཙམ་གྱིས་འཇིག བྱེ་མ་འདྲེས་ན་འབྱར་དཀའ་ཞིང་གོག་མགྱོགས། བ་ཚྭ་འདྲེས་ན་རླན་གྱིས་གནོད་ཅིང་ཡུན་རིང་ན་ཞལ་བ་བྱ་ཡུལ་གྱི་གྱང་རྩིག་པ་སོགས་ཀྱང་འཇིག་ཉེན་ཆེ། རྡོ་འདྲེས་ཤིང་ས་བརྡུང་མ་ཐུབ་ན་ཞལ་བ་འཇམ་པོ་མི་འོང་བས་གཟབ་གལ་ཆེ།
ཐང་ག
བོད་ཀྱི་ལོ་རྒྱུས་ཁག་ལས། རྒྱལ་བོ་སྲོང་བཙན་གྱི་དུས་སུ་རྒྱ་བཟའ་བོད་དུ་སྤྱན་འདྲེན་པ་དང་ལྷན་དུ་ཇོ་བོ་ཤཱཀྱ་མུ་ནེ་དང་བཟོ་སྣ་བཅོ་བརྒྱད་སོགས་བོད་དུ་དྲངས། ཕན་ཚུན་སློབ་མ་དང་བཟོ་རྩལ་པ་མངགས་པར་གསུངས། ཁྲི་སྲོང་ལྡེ་བཙན་གྱིས་བསམ་ཡས་བཞེངས་སྐབས་དར་ཐང་ཆེན་མོ་གསུམ་བཞེངས་པ་ལས་བོད་ལ་རྒྱལ་བོ་ཁྲི་སྲོང་ལྡེ་བཙན་གོང་དུ་ཐང་ག་བཞེངས་སྲོལ་དར་བ་ཤིན་ཏུ་གསལ། བོད་ཀྱི་ཐང་གའི་བྲིས་ལུགས་ལ་སྨན་ཐང་ལུགས་དང་ཀརྨ་སྒར་ལུགས། བལ་བོའི་ལུགས། བྱིའུ་སྒང་ལུགས། མཁྱེན་བརྩེ་ལུགས་བཅས་ལྔ་ཡོད་པ་དང་། ཐང་ག་ལ་རིགས་དགར་ན་སྐྱ་ཐང་དང་། ཚོན་རྫོགས། ཐང་ནག མཚལ་ཐང་། གསེར་ཐང་། གོས་སྐུ། གོས་སྐུ་འབུར་མ། འཚེམ་ཐང་། འཐག་ཐང་། མུ་ཏིག་གི་ཐང་ཀ ཕྱིས་སུ་དར་བའི་ཆུ་རིས་མ། ཕྱི་གླིང་ལུགས་ཀྱི་འབུར་ཚུགས་ཅན་སོགས་ཡོད་པ་རེད།
དཀྲལ་འཐག་ཐང་ག
དཀྲལ་འཐག་ཐང་ག་ནི་སྤྱི་ཚོགས་ཁྲོད་བཟོ་ལས་ཤེས་རིག་དར་བའི་རྗེས་སུ་བྱུང་བའི་ལག་རྩལ་གསར་པ་ལ་བརྟེན་ནས་བྱུང་པའི་ཐང་གའི་རིགས་ཤིག་ཡིན་ལ། དེ་ནི་རྒྱ་ནག་གི་གོས་ཆེན་འཐག་པ་དང་མཚུངས་ཤིང་། དེང་དུས་ཀྱི་འཕྲུལ་འཁོར་ལས་བཟོས་པའི་སངས་རྒྱས་སྟོང་སྐུ་ལ་སོགས་མགྱོགས་ཤིང་རིན་གོང་ཆུང་བའོ། །
ཀོ་བསེ།
ཀོ་བསེ་བཟོ་བའི་ལག་རྩལ་ནི་ཆེས་སྔ་མོ་ནས་ཡོད་ཚུལ་གསུངས་ལ་གཙོ་ཆེར་རྒྱུན་གཏན་གྱི་འཚོ་བའི་ནང་བེད་སྤྱོད་ཆེ་བའི་གའུ་དང་ཀོ་སྒམ། དེ་བཞིན་ཟས་སྣོད་ཀོ་སྡེར་ དང་བསེ་ཕུབ་སོགས་བཟོ་ཡི་ཡོད་པ་མ་ཟད། དད་ལྡན་གྱི་སྐུ་འདྲ་ཡང་བཞེངས་སྲོལ་ཡོད་དེ་དགོན་སྡེ་དང་དམངས་ཁྲོད་དུ་ཀོ་བསེ་ལས་བཟོས་པའི་སྐུ་འདྲ་ཆེ་ཆུང་སྣ་ཚོགས་དེང་ཡང་མཇལ་རྒྱུ་ཡོད།
རས་གཞི་བཟོ་སྟངས།
རས་གཞི་བཟོ་སྟངས་ནི་ཐང་ག་བྲི་བྱའི་རས་གཞི་བཟོ་བའི་གོ་རིམ་བརྗོད་པ་ལ་ཟེར་བ་ཡིན།
ཀུན་འདུས་ཞལ་ཐང་ཆེན་མོ།
ཞལ་ཐང་འདི་ནི་མཚོ་སྔོན་ཞིང་ཆེན་ཟི་ལིང་གྲོང་ཁྱེར་དུ་ཡོད་པའི་མཚོ་སྔོན་བོད་ཀྱི་རིག་གནས་དངོས་མང་བཤམ་སྟོན་ཁང་དུ་ཉར་ཚགས་བྱས་ཡོད། སྤྱི་ལོ1999ལོའི་ཟླ12པར་འཛམ་གླིང་གི་ཅི་ཉི་སི་ཟིན་ཐོ་ཆེན་མོར་བཀོད་དེ། འཛམ་གླིང་སྟེང་ཆེས་རིང་བའི་ཐང་གར་གྱུར།
ཟླ་ཐང་།
ཟླ་ཐང་ཞེས་པ་ནི་བོད་ཀྱི་རི་མོ་གསར་རྩོམ་བྱེད་སྟངས་ཤིག་ཡིན་ལ། དེ་ནི་ཞལ་ཐང་གཅིག་འབྲི་བཞེངས་བྱས་པའི་དུས་ཡུན་ལ་གཞིགས་ཏེ་དེ་ལྟར་བཏགས་པ་ཞིག་ཡིན། འདི་དང་ལོ་ཐང་དང་ཉིན་ཐང་བྱ་གསུམ་གྲག་སོགས་ནི་རིགས་གཅིག་ཏུ་འདུ་སྟེ། ཐང་ག་གང་ཞིག་རས་གཞི་བཟོ་བ་ནས་གོ་རིམ་བཞིན་འབྲི་བཞེངས་བྱས་ཏེ་སྤྱན་འབྱེད་གྲུབ་པའི་བར་བེད་སྤྱོད་བཏང་པའི་དུས་ཡུན་ལ་གཞིགས་ཏེ་དེ་ལྟར་མིང་དུ་བཏགས་པ་ཞིག་རེད།
ལོ་ཐང་།
ལོ་ཐང་ཞེས་པ་ནི་ཟླ་ཐང་དང་ཆ་འདྲ་བར་ཐང་ག་གང་ཞིག་བཞེངས་པའི་དུས་སུ་དུས་ཡུན་ཧྲིལ་པོ་ལོ་གཅིག་ཏག་ཏག་དགོས་པའི་རིགས་དེ་ལ་བྱའོ། །
ཚོན་ཐང་།
ཚོན་ཐང་ནི་མཚོན་མདོག་གིས་བཞེངས་པའི་ཐང་གའི་རིགས་ཡིན་ལ། དེ་ནི་རི་མོའི་ཁྲོད་ཆེས་སྤྱིར་བཏང་གི་སྣང་ཚུལ་ཤིག་ཡིན། ལོ་རྒྱུས་ཁྲོད་ད་ལྟའི་བར་མ་ཉམས་པར་རྒྱུན་འཛིན་བྱས་ཡོང་བའི་མཚོན་ཐབས་གལ་ཆེ་ཤོས་དེ་ཡང་རེད། དེ་ལ་ཚོན་ཐང་ཟེར་དགོས་པའི་རྒྱུ་མཚན་ནི་ནག་ཐང་དང་གསེར་ཐང་། མཚལ་ཐང་སོགས་དང་ལྟོས་འཇོག་གིས་མིང་བཏགས་པ་ཞིག་ཡིན།
ནག་ཐང་།
ནག་ཐང་ནི་རི་མོའི་རས་གཞི་ལ་སྣག་ཚ་ལེགས་པར་བྱུགས་པའི་སྟེང་དུ་བརྗོད་བྱ་གང་ཞིག་རྡོ་ཡིས་བཀོད་པ་བྱས་ཏེ་གཏན་ཁེལ་བྱས་རྗེས། གསེར་སོགས་རིན་པོ་ཆེའི་རིགས་ཀྱི་ཚོན་ལས་ཕུན་སུམ་ཚོགས་པའི་བཅད་ཀྱི་རྩལ་ལ་བརྟེན་ཏེ་རི་མོ་གསར་རྩོམ་བྱ་ཐབས་ཤིག་ཡིན།
མཚལ་ཐང་།
མཚལ་ཐང་ནི་ནག་ཐང་དང་གསེར་ཐང་སོགས་ལ་ཆ་འདྲ་བ་སྟེ། དེ་ཡང་ལས་སྣོན་ལེགས་པར་གྲུབ་པའི་རས་གཞི་ལ་ཚོན་རྒྱུ་ལེགས་པའི་མཚལ་ལེབ་བྱུགས་སྙོམས་པོར་བྱས་པའི་སྟེང་དུ། གསེར་གྱིས་བཅད་ལ་བརྟེན་ནས་སྣང་བརྙན་འབྲི་བཞེངས་བྱེད་པའི་མཚོན་ཐབས་ཤིག་ལ་ཟེར།
གོས་ཐང་།
གོས་ཐང་ནི་བོད་ཀྱི་སྲོལ་རྒྱུན་རི་མོའི་ཁྲོད་ཀྱི་མེ་ལོང་གི་གཞི་རྒྱ་ཆེ་ཤོས་ཀྱི་ཐང་ག་སྒྱུ་རྩལ་གྱི་མཚོན་ཐབས་ཤིག་ཡིན་ལ། དེ་ནི་རི་མོ་དང་ལག་ཤེས་བཟོ་རྩལ་ཟུང་འབྲེལ་སྒོས་གྲུབ་པའི་སྒྱུ་རྩལ་གྱི་རྣམ་པ་ཞིག་ཀྱང་ཡིན།
འཚེམ་དྲུབ་ཐང་ག
འཚེམ་ཐང་ལ་ཁ་ཅིག་གིས་གཙགས་སྐུའང་ཟེར། དེ་ནི་ཀ་ཤི་ཀ་ལ་སོགས་ཀྱི་རས་དང་རི་མོ་མེད་པའི་གོས་ཆེན་གྱི་སྟེང་དུ་ཚོན་སྐུད་སྣ་ཚོགས་ཀྱིས་འཚེམ་དྲུབ་བྱས་ནས་གྲུབ་པ་ཡིན། ཕལ་ཆེ་བ་བོད་ཀྱི་ཐང་གའི་མ་དཔེ་རྒྱ་ནག་ཏུ་ཁྱེར་ནས་རྒྱ་ནག་གི་འཚེམ་དྲུབ་མཁན་གྱིས་ལག་རྩལ་ལས་ཐོན་པ་ཡིན།
| ཐང་ག བརྡ་འགྲེལ 18 ཡོད། |