སྤོས་ཤེལ།
གནའ་དུས་གསོམ་ཤུག་གི་ཐང་ཆུ་ས་འོག་གཏིང་ཟབ་སར་སོང་ནས་རིམ་གྱིས་རྡོར་གྱུར་པ་ཡིན་ཞིང་། མདོག་སེར་སྨུག་ཅན་དྭངས་པ་ཞིག རྒྱན་ཆ་དང་དྲི་ཞིམ་གྱི་རྫས་བྱེད་ཆོག་ལ་ནུས་པས་མིག་ནད་རབ་རིབ་ལ་ཕན།
ཏིལ།
ལོ་ཏོག་རིགས་ཤིག་གི་མིང་སྟེ། འབྲུ་ལ་དཀར་ནག་གཉིས་ཡོད། རོ་མངར། ཞུ་རྗེས་དྲོད། ནུས་པས་རླུང་འཇོམས། ལུས་སྟོབས་འཕེལ་བར་བྱེད། ཆུ་སེར་ལའང་ཕན།
ཀ་ཀོ་ལ།
རྒྱ་གར་ནག་དང་ལྷོ་མོན་ནས་ཐོན་པའི་རྩྭ་ལྡུམ་གྱི་འབྲས་བུ་དེའི་ལོ་སྡོང་ལྗང་གུ་དང་འབྲུའི་པགས་པ་མཐུག་ཅིང་སུལ་ཅན། དྲི་རོ་ག་བུར་དང་ཕྱོགས་མཚུངས་པ་འདིས་ཕོ་འཚེར་གྱི་གྲང་ནད་སེལ།
ཀ་ཐོ།
དཔེ་དེབ་ཐོ་འགོད་སྐབས་ཨང་ཀིའི་ཚབ་ཏུ་ཀ་ཁའི་རིམ་པ་བསྒྲིགས་ཏེ་ཀ་མད་སུམ་ཅུ་དང་དབྱངས་བཞི་བཅས་ཀྱི་གོ་རིམ་ལྟར་སྡེ་ཚན་བསྒྲིགས་པའི་ཐོ་ལ་ཟེར།
ཀ་བ།
ལྕགས་དང་། རྡོའམ་ཤིང་སོགས་ལས་བཟོས་པའི་དངོས་པོའི་དབྱིབས་ཟླུམ་པོའམ་གྲུ་བཞི་ནར་མོ་རིང་པོ། ཁང་པ་དང་། ཟམ་པ་སོགས་ཀྱི་གདུང་མ་འདེགས་བྱེད།
ཀ་རྟེན།
ཀ་རྟིང་བརྟན་པོ་ཡོང་བ་དང་། ཀ་བའི་རྩ་བ་མི་རུལ་ཆེད་ཀ་རྟིང་གི་འོག་ཏུ་གདིང་རྒྱུའི་རྡོ་བ།
ཀ་ར།
1.ཇ་དང་ཁ་ཟས་ལ་བྲོ་བ་འདོན་བྱེད་ཀྱི་རྫས་རོ་ཤིན་ཏུ་མངར་བ་ཞིག་སྟེ། བུ་རམ་ཤིང་སོགས་བཙོ་སྦྱང་བྱས་ནས་བཟོས་པ་ཡིན། 2.སྦྲ་གུར་གྱི་གདུང་མ་དང་ཆོན་ཐག་འགེར་བྱེད་ཀྱི་ཀ་རྒྱུག་གི་མིང་།
ཀ་སྡེ།
གསལ་བྱེད་ཀྱི་ཡི་གེ་རྣམས་སྡེ་ཚན་ཕྱེད་དང་བརྒྱད་དུ་ཕྱེ་བའི་ནང་གི་སྡེ་ཚན་དང་པོ་ཀ་ཁ་ག་ང་བཞི་ལ་ཀ་སྡེ་ཟེར།
| སྲོལ་རྒྱུན་སྒྲ་རིག་པ། བརྡ་འགྲེལ 40928 ཡོད། |