ཀྲུང་གོའི་དམངས་གླུ།
ལོ་རྒྱུས་རིང་པོ་ལྡན་པའི་ཀྲུང་གོའི་དམངས་གླུའི་རྗོད་བྱེད་ལས་རིགས་དབྱེ་ན་རི་གླུ་དང་གླུ་ཆུང་། ཧའོ་ཙེ་བཅས་གསུམ་ཡོད། བརྗོད་བྱའི་ནང་དོན་ནི་སྤྱི་ཚོགས་ཀྱི་འགལ་བ་དང་། ཐོན་སྐྱེད་ངལ་རྩོལ། ཉིན་རྒྱུན་གྱི་འཚོ་བ། ཡུལ་སྲོལ་གོམས་གཤིས་བཅས་ཡིན།
གནའ་སྲོལ་རོལ་མོ།
གནའ་སྲོལ་རོལ་མོ་ནི་དུས་རབས18པའི་དུས་སྨད་ནས་དུས་རབས19ལོ་རབས20པའི་རིང་ལ་རོལ་མོའི་གྲོང་ཁྱེར་ཝེ་ཡེ་ན་རུ་རོལ་མོ་བ་སྐོར་ཚོ་ཞིག་འདུས་ནས་རོལ་མོའི་བརྩམས་ཆོས་འབོར་ཆེན་མཛད་པ་དང་། དེ་དག་གིས་མངོན་སུམ་རིང་ལུགས་ཉིད་གསར་རྩོམ་གྱི་དོན་གཉེར་བྱས་ཏེ་བབས་ཆགས་ཀྱི་རོལ་མོའི་སྐད་བརྡ་དང་། དམ་ཚགས་ཆེ་བའི་སྲོལ་ལུགས་དང་ཐབས་ཤེས། མངོན་གསལ་ཆེ་བའི་བསམ་བློ་དང་བརྩེ་དུང་བཅས་ཀྱི་ཐོག་ནས་མང་ཚོགས་ཀྱི་འདོད་བློ་དང་སྐྱེ་སྟོབས་འབར་བའི་འཚོ་བའི་སྤྲོ་བ་མཚོན་པ་རེད།
གཞས་མ་གཏམ།
གཞས་མ་གཏམ་ཞེས་པ་ནི་ཀྲུང་ཧྭ་མི་རིགས་ཀྱི་གཞས་མ་གཏམ་གྱི་སྒྱུ་རྩལ་གྱི་སྤྱི་མིང་ཡིན་པ་དང་། དེ་ནི་དམངས་ཁྲོད་ཀྱི་ངག་ཐོག་རྩོམ་རིག་དང་གླུ་ལེན་སྒྱུ་རྩལ་ཉིད་དུ་ཡུན་རིང་པོར་དར་ཞིང་རྒྱས་ནས་བྱུང་བའི་སྒྱུ་རྩལ་གྱི་རྣམ་གྲངས་དམིགས་བསལ་ཅན་ཞིག་ཡིན།
གཟབ་བརླིང་རོལ་མོ།
གཟབ་བརླིང་རོལ་མོ་ཞེས་པ་ནི་ཀུན་ཁྱབ་རོལ་མོ་ལ་ལྟོས་ཏེ་བཤད་པའི་བརྗོད་གཞི་དང་ནང་དོན་གཟབ་ནན་ཆེ་བ་དང་། སྒྱུ་རྩལ་གྱི་རྣམ་པ་ངེས་སྲོལ་ལྡན་པའི་སློབ་གསོ་དང་མཛེས་དཔྱོད་ཀྱི་དོན་སྙིང་ངེས་ཅན་ལྡན་པའི་རོལ་མོ་ལ་ཟེར།
དམག་སྦྲེང་རོལ་དབྱངས།
དམག་སྦྲེང་རོལ་དབྱངས་ཀྱི་མ་གཞི་ནི་དམག་དཔུང་གྲལ་བསྟར་བསྒྲིགས་ནས་སྐྱོད་དུས་གོམ་སྟབས་གཅིག་གྱུར་ཡོང་བྱེད་དང་། དམག་དཔུང་གི་ཟིལ་ངར་སྐྱེད་བྱེད། ངར་སེམས་སྐུལ་བྱེད་བཅས་ཀྱི་དམག་སྦྲེང་སྒྲིག་པའི་རོལ་དབྱངས་ཡིན།
དམངས་གླུ།
རོལ་མོའི་ནང་གསེས་ཤིག་སྟེ་མི་དམངས་མང་ཚོགས་ཀྱིས་འཚོ་བའི་ཉམས་ལེན་གྱི་ཁྲོད་དུ་ངག་ཐོག་ནས་བརྒྱུད་དེ་བྱུང་ཞིང་དར་བའི་གླུ་དབྱངས་སྒྱུ་རྩལ་ཡིན། དེ་ལ་ཁྱད་ཆོས་གཙོ་བོར་ཁྱད་ཆོས་གསུམ་ལྡན་པ་རེད།
རོལ་མོ།
རོལ་མོ་ནི་སྒྲ་རླབས་ཀྱི་གཡོ་འགུལ་ལ་བརྟེན་ནས་གནས་པ་དང་དུས་ཀྱི་ནང་དུ་མངོན་ལ་མིའི་རིགས་ཀྱི་རྣ་ཤེས་ཀྱིས་ཟིན་པའི་བསམ་བག་སྣ་ཚོགས་སྐྱེད་ཐུབ་པའི་སྒྱུ་རྩལ་གྱི་ནང་གསེས་ཤིག་ཡིན།
ལྗད་ཟི་རོལ་མོ།
རོལ་མོའི་འགྲོས་རྡེབ་ནི་སྤྱིར་བཏང་གི་ངེས་སྲོལ་ལྟར་ན་དྲག་པ་སྔོན་དང་ཞན་པ་ཕྱི་ན་ཡོད་དགོས་མོད་ཀྱི། ལྗད་ཟི་རོལ་མོ་ཞེས་པ་ནི་དྲག་ཞན་གོ་ལྡོག་ནས་རོལ་དབྱངས་ཉིད་སྤྱི་ཆ་ནས་ལྷོད་ཅིང་ལྷུག་པའི་གྲུབ་ཚུལ་དང་། གདངས་ཚད་དམིགས་བསལ་ཆེ་བ། གང་དགའི་རྡུང་དཀྲོལ་བྱེད་པ་བཅས་བྱས་ཆོག་པ་རེད།
སྐད་སྒྲའི་རོལ་མོ།
སྐད་སྒྲའི་རོལ་མོ་ཞེས་པ་ནི་མིས་ལེན་པ་གཙོ་བོ་བྱས་པའི་རོལ་མོའི་རྣམ་པ་ལ་ཟེར། དེ་ཉིད་ལེན་སྟངས་ཀྱི་སྒོ་ནས་དབྱེ་ན་རིགས་བཞི་ཡོད་པ་དང་། སྐད་སྒྲའི་རོལ་མོ་ཉིད་ལེན་སྲོལ་གྱི་སྒོ་ནས་དབྱེ་ན་རིགས་གསུམ་ཡོད་པ་རེད།
སྐོར་གཞས།
སྐབས་འདིའི་སྐོར་གཞས་ཞེས་པ་ནི་ཡོ་རོབ་ཀྱི་ཧྭ་ཨེར་ཚི་ཞེས་པའི་ཞབས་བྲོའི་རོལ་མོ་ལ་གོ་ཞིང་། དེའི་མཆེད་ཁོངས་ནི་ཨོ་སི་ཁྲི་རུ་ཡའི་བྱང་རྒྱུད་དུ་བྱུང་བའི་འགྲོས་རྡེབ་གསུམ་ལྡན་གྱི་ཞིང་པའི་སྐོར་གཞས་རེད།
སྦུག་རྒྱུད་རོལ་མོ་ཚོགས་པ།
སྦུག་རྒྱུད་རོལ་མོ་ཚོགས་པ་ནི་མཉམ་དཀྲོལ་རོལ་དབྱངས་ཉིད་སྒྲའི་རྣམ་པ་ཅན་དུ་སྒྱུར་བྱེད་ཀྱི་ཡོ་ཆས་ཡིན། སྦུག་རྒྱུད་རོལ་མོ་ཚོགས་པ་གཅིག་གི་གྲུབ་ཆ་ལ་རོལ་ཆས་ཚོ་ཁག4ཡོད་པ་སྟེ། རྒྱུད་འཐེན་རོལ་ཆས་ཚོ་ཁག་དང་། ཤིང་སྦུག་རོལ་ཆས་ཚོ་ཁག་བཅས་ཡིན།
ནང་མ།
ནང་མ་ནི་གནའ་བོའི་དམངས་ཁྲོད་ཀྱི་རོལ་མོ་དང་ཞབས་བྲོའི་རྨང་གཞིའི་ཐོག་བསྒྱུར་བཅོས་གོང་འཕེལ་བྱུང་བའི་གླུ་གཞས་ཀྱི་རྣམ་པ་ཞིག་ཡིན་པར་ངེས། ནང་མའི་གླུ་གདངས་གནའ་ཉམས་དོད་པ་དང་གར་སྟབས་ཀྱི་ཉམས་འགྱུར་མཛེས་པ། མི་རིགས་ཀྱི་ཁྱད་ཆོས་ཟབ་མོ་ལྡན་པ་བཅས་ཡིན་པས་དབུས་གཙང་ཁུལ་དུ་དར་ཁྱབ་ཤིན་ཏུ་ཆེ།
སྟོད་གཞས།
སྟོད་གཞས་ནི་བོད་ཀྱི་སྟོད་རྒྱུད་དམ་ནུབ་རྒྱུད་ཁུལ་གྱི་གླུ་གར་ལ་ཟེར་ཞིང་། སྟོད་ཞེས་པ་དེར་གོ་དོན་གཉིས་ཡོད་པ། དེ་ཡང་གཅིག་ནི་སྔར་གྱི“སྟོད་མངའ་རིས་སྐོར་གསུམ”གྱི་སྟོད་དེ། ད་ལྟའི་བོད་རང་སྐྱོང་ལྗོངས་གཞིས་རྩེ་ས་ཁུལ་གྱི་ནུབ་བྱང་བརྒྱུད་ནས་མངའ་རིས་ས་ཁུལ་གྱི་ས་ཆ་ཁག དེ་བཞིན་ཀ་ཤི་རྨིར་གྱི་ལ་དྭགས་ཁུལ་བཅས་ལ་ཟེར་བ་དང་། གོ་དོན་གཞན་ཞིག་ནི་བོད་ལྗོངས་མཐོ་སྒང་གི་མི་མང་ཆེ་བ་གཙང་བོ་དང་ཆུ་བོའི་རྒྱུད་དུ་འཚོ་བས། བོད་པ་རྣམས་ཀྱི་གོམས་སྲོལ་ལྟར་ན་གཙང་བོ་དང་ཆུ་བོའི་རྒྱུག་ཕྱོགས་ལ་གཞིགས་ནས་ཁ་ཕྱོགས་དབྱེ་བ་འབྱེད་པ་དང་། གཙང་བོ་དང་ཆུ་བོའི་སྨད་རྒྱུད་དག་ལ་སྨད་དང་སྟོད་རྒྱུད་དག་ལ་སྟོད་ཟེར། དེས་ན་ཡར་ཀླུང་གཙང་བོའི་སྟོད་རྒྱུད་དུ་གནས་པའི་དིང་རི་དང་། ལྷ་རྩེའི་རྒྱུད་དང་དེ་བཞིན་དེ་དག་གི་ནུབ་ཕྱོགས་སུ་གནས་པའི་ཡུལ་དག་ལ་སྟོད་གཞས་ཟེར་བ་ཡིན།
དབུ་མཛད་ཀྱི་སྐྱོར་འདོན་སྒྲ་གདངས།
དབུ་མཛད་དམ་སྐྱོར་དཔོན་གྱིས་ཆོས་འདོན་པའི་སྒྲ་གདངས་ནི་སྒྲ་མཐོ་བ་ནས་ཆེས་དམའ་བའི་སྒྲ་ཁོངས་སུ་འདྲེད་པའི་རྣམ་པའི་ཐོག་ནས་འདོན་པ་དང་། དབུ་མཛད་ལ་སྒྲ་མཐོ་དམའ་འོས་ཤིང་འཚམ་པར་སླེབས་པའི་མྱོང་ཚོར་བྱུང་རྗེས། སྒྲ་གཅིག་བསྐྱར་ཟློས་དང་འདྲ་བའི་དབྱངས་ཚིག་ཐུང་ངུ་འགྱུར་བ་ཅུང་ཟད་ལྡན་པའི་ཐོག་ནས་བསྐྱར་ཟློས་བྱེད་པ་ལས་གྲུབ་པ་དེར། དམིགས་བསལ་གྱི་གྲུབ་གཞིའི་ཤུགས་ལྡན་པ་ཞིག་ཡིན། སྦོམ་ཞིང་ལྷིང་བའི་སྐྱོར་འདོན་སྒྲ་གདངས་དེ་རིགས་ལ་ཡིད་འགུལ་ནུས་པ་ཆེན་པོ་ལྡན་པ་མ་ཟད། གདངས་གནས་མང་པོ་བརྩེགས་པའི་ཁྲོད་སྒྲ་བསྐྱེད་ཀྱི་ནུས་པ་ཆེན་པོ་ཞིག་གྲུབ་ཀྱི་ཡོད།
གར་རོལ།
གར་ཞེས་པ་ནི་ཞབས་བྲོའི་དོན་ཡིན་ཞིང་། ཐོག་མར་སྟོད་མངའ་རིས་སྐོར་གསུམ་དུ་དར་བའི་གླུ་གར་གྱི་རིགས་ཤིག་གི་མིང་ཡིན། གང་དེ་ཕྱིས་སུ་གཞིས་རྩེ་སོགས་བརྒྱུད་ནས་ལྷ་སར་དར་རྗེས། དེའི་རྣམ་པ་དང་ནང་དོན་སོགས་ཚང་མར་འགྱུར་བ་ཆེན་པོ་བྱུང་ནས། མཆོད་སྤྲིན་གར་རོལ་ཞེས་པ་གཙོ་བོ་ཕོ་བྲང་ནང་འཁྲབ་བྱའི་གླུ་གར་ཞིག་ཏུ་གྱུར།
སྟབས་བདེའི་སྙེག་ཟློས།
སྟབས་བདེའི་སྙེག་ཟློས་ནི་གཙོ་བོ་སྣེ་ཁྲིད་རྣམ་ཐར་གྱི་དབྱངས་མཇུག་སྒྲ་གདངས་དེ་རམ་སྐྱོར་རྣམ་ཐར་གྱི་གདངས་གནས་ནང་འགྱུར་ལྡན་བསྐྱར་ཟློས་བྱེད་པའི་ཁྲོད་རྗེས་སྣོན་རྒྱན་དབྱངས་རྣམ་པའི་སྒྲ་གདངས་གྲུབ་པ་མ་ཟད། སྙེག་ཟློས་དང་གཅིག་ལམ་གཅིག་འདེབས་ཀྱི་རྣམ་པ་གྲུབ་ཀྱི་ཡོད།
དབྱངས་བདུན།
སྒྱུ་སྩལ་དྲུག་བཅུ་རེ་བཞིའི་ནང་གསེས་རིགས་ཤིག་སྟེ། དྲུག་སྐྱེས། དྲང་སྲོང་། ས་འཛིན། བར་མ། ལྔ་ལྡན། བློ་གསལ། འཁོར་ཉན་དང་བདུན་ལ་ཟེར།
ཇོ་ནང་རོལ་དབྱངས།
ཇོ་ནང་རོལ་དབྱངས་ནི་བོད་བརྒྱུད་ནང་བསྟན་གྱི་རོལ་དབྱངས་ཁྲོད་མཚན་སྙན་ཕྱོགས་བཞིར་ཁྱབ་པའི་གནའ་བོའི་རོལ་དབྱངས་ཀྱི་བྱེ་བྲག་ཅིག་ཡིན།
རོལ་མོའི་བསྟན་བཅོས་རྩ་འགྲེལ་དཔེ་བསྡུར་མ་བཞུགས་སོ།།
དེབ་འདིར་གཙོ་སྒྲིག་པས་ས་སྐྱ་པཎྜི་ཏ་ཀུན་དགའ་རྒྱལ་མཚན་གྱིས་མཛད་པའི་རིག་པའི་གནས་ཀྱི་བྱེ་བྲག་གསལ་བར་བྱེད་པ་རོལ་མོའི་བསྟན་བཅོས་མདོ་ཙམ་བཤད་པ་ཞེས་བྱ་བ་དང་འཇམ་མགོན་ཨ་མེས་ཞབས་ངག་དབང་ཀུན་དགའ་བསོད་ནམས་ཀྱིས་མཛད་པའི་རིག་པའི་གནས་ལྔ་ལས་བཟོ་རིག་པའི་བྱེ་བྲག་རོལ་མོའི་བསྟན་བཅོས་ཀྱི་རྣམ་པར་བཤད་པ་འཇམ་དབྱངས་བླ་མ་དགེས་པའི་སྙན་པའི་སྒྲ་དབྱངས་བློ་གསལ་ཡིད་འཕྲོག་ཕྲིན་ལས་ཡོངས་ཁྱབ་ཅེས་བྱ་བ་རྩ་འགྲེལ་གཉིས་པོད་གཅིག་གི་བདག་ཉིད་དུ་བྱས་ཏེ་པར་བསྐྲུན་བྱས་ཤིང་། དེར་རྩ་བ་ཞུ་དག་བྱེད་པའི་སྐབས་སུ་རྩེ་པོ་ཏཱ་ལར་བཞུགས་པའི་བྲིས་མ་དང་སྡེ་དགེའི་པར་མ་གཞིར་བཟུང་ནས་ལེགས་བསྒྲིགས་བྱས་ཏེ་མི་རིགས་དཔེ་སྐྲུན་ཁང་གིས་སྤྱི་ལོ1988ལོའི་ཟླ10པར་པར་ཐེངས་གཉིས་པ་དཔར་དུ་བསྐྲུན་པའི་མགོ་འཚེམ་མ་དེ་བསྡུར་གཞིར་བཟུང་ཞིང་། དབུ་མེད་གནའ་དཔེ་བྲིས་མ་ཞིག་སྡུར་བྱེད་ལ་བཟུང་ནས་དཔེ་བསྡུར་ཞིབ་ཚགས་བྱས་ཡོད།
རོལ་དབྱངས་དང་ཞབས་བྲོ་རིག་པ།
རོལ་དབྱངས་དང་ཞབས་བྲོ་ནི་རོལ་དབྱངས་དང་ཞབས་བྲོ་མཉམ་འདྲེས་བྱེད་པའི་རིག་ཚན་ཞིག་ཡིན་ལ། སྒྱུ་རྩལ་གྱི་ཉམས་འགྱུར་ལྡན་པའི་ཤེས་ལྡན་མི་སྣ་གསོ་སྐྱོང་བྱེད་ཆེད་བཙུགས་ཤིང་། དེ་ནི་འཁྲབ་སྟོན་དང་སྒྱུ་རྩལ་ལས་རིགས་ལ་མེད་དུ་མི་རུང་བའི་རིག་ཚན་ཞིག་ཡིན་ལ། དེའི་ཁོངས་གཏོགས་སུ་རིམ་པ་གཉིས་པའི་ཆེད་ལས་གྲས་རོལ་དབྱངས་འཁྲབ་སྟོན་དང་། རོལ་དབྱངས་རིག་པ། གཞས་གདངས་རིགས་པའི་གཞུང་ལུགས། ཞབས་བྲོ་འཁྲབ་སྟོན། ཞབས་བྲོའི་འཁྲབ་ཁྲིད་སོགས་ཚུད་ཡོད།
ཆོས་དཔེ་སྐྱོར་འདོན་གྱི་སྒྲ་གདངས།
ཆོས་དཔེ་སྐྱོར་འདོན་གྱི་སྒྲ་གདངས་ལ་འགྱུར་ཁུག་མང་པོ་མེད་ལ། གཙོ་བོ་ནི་བསྐྱར་བཟློས་བདེ་བའི་དབྱངས་ཚིག་ཐུང་ངུས་གྲུབ་ཡོད། དེར་བརྟེན་སྐྱོར་འདོན་པས་ཆོས་དཔེ་སྐྱོར་འདོན་གྱི་སྒྲ་གདངས་ཀྱང་དབྱངས་འགྲོས་ཀྱི་རྣམ་པའི་དུམ་བུའི་ཆོས་ཉིད་གཞིར་འཛིན་པ་སྟེ། འཕྲེད་ཀྱི་དུམ་བུའི་གཅིག་གྱུར་དབྱངས་འགྲོས་གཞི་འཛིན་ས་གཙོ་བོར་འཛིན་པ་ལས་འགྱུར་ཁུག་གི་ལངས་འཇགས་སྔོན་འགྲོའི་ཆ་རྐྱེན་དུ་འཛིན་གྱི་མེད། ཡིན་ནའང་སྐྱོར་འདོན་པར་རང་ཉིད་ཀྱི་སྐད་ཀྱི་ཆ་རྐྱེན་གྱི་ཚོད་འཛིན་ཕོག་པའི་རྐྱེན་གྱིས་གདངས་མཐོ་དམའ་མི་འདྲ་བའམ་སྒྲ་ཁོངས་མི་འདྲ་བ་ཡོད་པས་སྐྱོར་འདོན་གྱི་སྒྲ་གདངས་ཀྱང་འགོ་འཛུགས་སྐབས་ཀྱི་སྒྲའི་མཐོ་དམན་མི་འདྲ་བ་སོགས་ཀྱི་རྐྱེན་གྱིས་གདངས་གནས་མང་བའི་བརྩེགས་མའི་རྣམ་པ་གྲུབ་ཀྱི་ཡོད།
གདངས་གནས་མཉམ་སྡེབ་ཀྱི་སྡེབ་སྒྲ།
གདངས་གནས་མཉམ་སྡེབ་ཀྱི་སྡེབ་སྒྲ་ནི་གཙོ་བོ་གདངས་གནས་མི་འདྲ་བའི་ཁྲོད་ཀྱི་འགྱུར་ཁུགས་ཀྱི་སྒྲ་གདངས་ཁག་གིས་རང་སོ་སོའི་གདངས་གནས་ཀྱི་འགྱུར་ཁུགས་ཀྱི་འཕེལ་ཕྱོགས་ལ་གཞིགས་ནས། དབྱངས་འགྲོས་མི་འདྲ་བའི་རྟེན་གཞིའི་ཐོག་གདངས་གནས་མི་འདྲ་བའི་འགྱུར་ཁུགས་ལས་གྲུབ་པའི་འགྲོས་མཚུངས་གདངས་གནས་མཉམ་སྡེབ་ཐུང་ངུའི་གྲུབ་པ་ཞིག་རེད།
| སྲོལ་རྒྱུན་རོལ་དབྱངས། བརྡ་འགྲེལ 22 ཡོད། |